«Qaırattyń» chempıondyq quramynda qandaı ózgeris bar
ALMATY. KAZINFORM – Qazaqstan Premer-lıgasynda top jaryp, klýb tarıhynda Chempıondar lıgasynyń negizgi kezeńine alǵash ret joldama alǵan «Qaırattyń» quramynda 2025 jyldyń qorytyndysy boıynsha birqatar ózgeris boldy.
El birinshiliginde ǵana emes, Eýropada aty shyqqan almatylyq komandanyń quramynda aýys-túıis kezeńi bastaldy. Búginge deıin «Qaırat» sapynan 5 oıynshy ketip, ázirge bir legıoner komanda qataryn tolyqtyrdy. Kelisimsharty aıaqtalǵan fýtbolshylardyń bireýi qazaqstandyq bolsa, qalǵan tórteýi – sheteldikter.
Aldymen 37 jastaǵy brazılııalyq shabýylshy Joao Paýlý jýyrda tórt maýsymǵa sozylǵan qyzyqty kezeńnen keıin almatylyq «Qaıratpen» kelisimshartyn toqtatty. Ótken maýsym bul shabýylshy úshin ońaı bolǵan joq – ol tize jaraqatyna baılanysty jasyl alańǵa shyǵyp, komandaǵa kómegin tıgize almady. Degenmen, surmergen fýtbolshynyń statıstıkasy kóńil kónshitedi. Atap aıtqanda ol «Qaırat» sapynda 47 gol soǵyp, 24 nátıjeli pas bergen. Buǵan deıin brazılııalyq oıynshy shymkenttik «Ordabasy» sapynda 50 goldyń óz atyna jazdy.
Budan soń almatylyq komanda 32 jastaǵy qaqpashy Aleksandr Zarýtskıımen qoshtasty. Ol klýbqa 2025 jyldyń basynda qosylyp, sońǵy týrlardy qospaǵanda el chempıonatynda negizgi qaqpashy boldy. «Seltıkke» qarsy oıynda jaraqat alǵanǵa deıin Chempıondar lıgasynyń irikteýi kezeńinderinde qaqpany qorǵady. Jalpy «Qaırat» sapynda 24 match ótkizip, onyń 9-ynda qaqpasyna gol ótkizgen joq. Qazirgi kezde Zarýtskıı – «Aqtóbe» komandasynyń oıynshysy.
Odan keıin 32 jastaǵy brazılııalyq shabýylshy Elder Santana kelisimshart merziminiń aıaqtalýyna baılanysty klýbtan ketti. Santana komanda qataryna 2024 jyldyń maýsym aıynda qosylyp, osy ýaqyt ishinde Qazaqstannyń eki dúrkin chempıony bolǵan. Biraq 2025 jyldyń basynda aýyr jaraqat alyp, maýsymnyń sońyna deıin qatardan shyǵyp qaldy. «Qaırat» sapynda ol 31 match ótkizip, 5 gol soǵyp, 3 nátıjeli pas berdi.
Sondaı-aq «Qaırat» sapynan negizgi quramdaǵy eki oıynshy ketkenin jazǵanbyz.
Olar – 28 jastaǵy jartylaı qorǵaýshy Gıorgı Zarıa men 27 jastaǵy ızraıldik Ofrı Arad. «Qaırat» sapyna 2024 jyldyń basynda qosylǵan Gıorgı jalpy 59 match ótkizip, 16 gol soqty jáne 11 nátıjeli pas berdi. 2024 jylǵy maýsymda Qazaqstan Premer-lıgasynyń úzdik jartylaı qorǵaýshysy atandy. 2025 jyly ol jaraqatyna baılanysty biraz oıynnan tys qalǵanymen, ishki birinshilik pen Chempıondar lıgasynda óz úlesin qosyp úlgerdi.
Al Ofrı «Qaıratqa» 2023 jyly qosylyp, bastapqyda ortalyq qorǵaýshy retinde oınady. Kelesi maýsymda jartylaı qorǵaýshy pozıtsııasyna aýysyp, komandanyń mańyzdy oıynshylarynyń birine aınaldy. Arad klýbqa 2024 jáne 2025 jyldary Qazaqstan chempıony atanýǵa, 2025 jylǵy Qazaqstan Sýperkýbogyn jeńip alýǵa, sondaı-aq Chempıondar lıgasynyń jalpy kezeńine shyǵýǵa kómektesti. «Qaırat» sapyndaǵy sońǵy matchynda ol «Djýzeppe Meatstsa» stadıonynda «Interdiń» qaqpasyna gol soqty (1:2). Almatylyq klýb quramynda úsh maýsym ishinde Ofrı Arad 92 match ótkizip, 3 gol soǵyp, 10 nátıjeli pas berdi.
Ázirge almatylyq komanda sapyn fınlıandııalyq jartylaı qorǵaýshy ıAakko Oksanen ǵana tolyqtyrdy. 25 jastaǵy oıynshymen kelisim 2027 jylǵy jeltoqsanǵa deıin jasalǵan.
2022 jyldan beri «Qaıratqa» qosylǵan deıin ıAakko «KýPS» komandasynda óner kórsetti. Ótken maýsymda ol 51 match ótkizip, 4 gol soǵyp, 8 nátıjeli pas bergen. Ol Fınlıandııa ulttyq quramasynda 1 match, U-21 jastar quramasynda 15 match oınap úlgergen. Eske salaıyq, jartylaı qorǵaýshy «KýPS» quramynda «Qaıratpen» UEFA Chempıondar lıgasynyń ekinshi irikteý kezeńinde kezdesti. Eki matchtyń qorytyndysy boıynsha almatylyqtar 3:2 esebimen jeńiske jetti.
Aıta keteıik, budan buryn BAQ pen áleýmettik jelilerde reseılik qorǵaýshy Egor Sorokınniń klýbtan ketetini týraly sybys tarady. Jelidegi málimetke sáıkes, ol qańtar aıyndaǵy Chempıondar lıgasynyń oıyndarynda «Qaıratqa» kómektesý úshin bir aıǵa jańa kelisimshart jasasqan. Sodan keıin onyń ujymnan ketýi yqtımal. Sonymen qatar BAQ betterinde Belarýs oıynshysy Valerıı Gromykonyń túrkııalyq klýbqa aýysýy múmkin ekeni aıtyldy.
Eske salaıyq, 2026 jyldyń jazynda kámelettik jasqa tolǵan soń, «Qaırat» akademııasynyń túlegi ári qazirgi quramnyń jas juldyzy Dastan Sátpaev resmı túrde aǵylshyn komandasy «Chelsıge» aýysady.