«Qaırattyń» Chempıondar lıgasy ekinshi irikteý kezeńindegi qarsylastary belgili boldy

ASTANA. KAZINFORM - Almatylyq «Qaırattyń» fýtboldan UEFA Chempıondar lıgasy ekinshi irikteý kezeńindegi qarsylastary anyqtaldy.

Almatylyq komanda atalǵan týrnırdiń birinshi irikteý kezeńinde Slovenııanyń «Olımpııa» komandasymen kezdesedi. Komandalar 8/9 shildede Lıýblıanada jáne 15/16 shildede Almatyda jarystyń ekinshi satysyna beriletin joldamany sarapqa salady. 

Kelesi kezeńge shyqqan jaǵdaıda almatylyq klýb KýPS (Fınlıandııa) jáne «Mılsamı» (Moldova) jubynyń jeńimpazymen kezdesedi. Oıyndar 22/23 shilde jáne 29/30 shildege belgilengen. 

Al jeńilgen jaǵdaıda Konferentsııa lıgasynyń ekinshi irikteý kezeńinde FKSB (Rýmynııa) - Inter (Andorra) jubynyń jeńimpazymen kezdesedi. Atalǵan lıganyń 2 irikteý kezeńindegi matchtar 24 jáne 31 shildege josparlanǵan. 

Endi Eýropa lıgasynda «Aqtóbe», Konferentsııa lıgasynda «Ordabasy» men «Astananyń» ekinshi irikteý kezeńindegi qarsylastary anyqtalady.

Buǵan deıin almatylyq «Qaırattyń» fýtboldan UEFA Chempıondar lıgasynyń ekinshi irikteý kezeńindegi qarsylastary anyqtalatynyn jazǵan edik.