«Qaırattyń» burynǵy bas bapkeri Kırıll Keker ómirden ótti
ALMATY. KAZINFORM — «Qaırat» FK komandanyń burynǵy bas bapkeri jáne akademııanyń qazirgi jetekshisi Kırıll Keker 46 jasynda ómirden ótkenin habarlady.
Ol almatylyq komandanyń negizgi quramyn 2022–2024 jyldary basqardy. Odan keıin 2024 jyldyń sońyna deıin «Ordabasynyń» negizgi komandasyn jattyqtyrdy.
2025 jyly «Qaırat» akademııasyna jetekshilik etip, sonymen qatar Qazaqstan U-19 quramasymen jumys istedi.
— Bul — búkil klýb úshin orny tolmas aýyr qaıǵy. On jyldan astam ýaqyt «Qaırat» júıesiniń ajyramas bóligi bolyp, qazaq fýtbolynyń damý baǵytyn aıqyndaýǵa atsalysqan adamnyń qazasy bárimizdi tereń kúızeltti. Kırıll Sergeevıch óz isine adal, talapshyl ári ádil maman edi. «Qaırat» FK Kırıll Sergeevıch Kekerdiń týystary men jaqyndaryna shyn júrekten kóńil aıtady, — dep habarlady klýb baspasóz qyzmeti.
Eske salaıyq, 2024 jyly sáýir aıynda «Qaırat» fýtbol klýbynyń bas bapkeri Kırıll Keker qyzmetinen ketti.
Keıin 2024 jyldyń tamyz-jeltoqsan aılarynda «Ordabasy» komandasynyń bas bapkeri boldy.