«Qaırattyń» bas bapkeri qyzmetinen kete me
ALMATY. KAZINFORM — «Qaırat» birinshi komandanyń bapkerin aýystyra ma? Klýb resmı málimdeme jasady.
Almatyda «Qaırat» pen «Elimaı» arasyndaǵy teń oıynnan keıin áleýmettik jelide almatylyq klýbtyń bapkeri Rafael Ýrazbahtınniń qyzmetinen ketetini týraly aqparat tarady. Bul qaýesetke baılanysty klýbtyń baspasóz qyzmeti resmı jaýap berdi.
— Aqparattyq keńistikte taraǵan bas bapkerdiń aýysýy múmkin ekeni týraly málimettiń shyndyqqa sáıkes kelmeıtinin habarlaıdy. Klýb Rafael Ýrazbahtınge jáne onyń bapkerler shtabyna tolyq senim bildiredi. Mamannyń qoldanystaǵy kelisimsharty 2027 jyldyń sońyna deıin jaramdy. Bas bapker qyzmetine qatysty eshqandaı ózgeris qarastyrylyp jatqan joq, — delingen málimdemede.
Sonymen qatar «Qaırat» klýby mundaı jarııalanymdy komanda tóńireginde jasandy túrde shıelenis týǵyzý jáne klýb ishindegi jumys atmosferasyn turaqsyzdandyrý áreketi retinde baǵalaıtynyn atap ótti.
— Bul áreket klýbtyń birligine, tańdalǵan baǵytqa degen senimine, alǵa qoıǵan maqsattaryna áser etpeıdi, — dep málimdedi komandanyń baspasóz qyzmeti.
Eske salaıyq, Qazaqstan Premer-lıgasynyń VII týrynyń aıasynla almatylyq «Qaırat» óz alańynda Semeıdiń «Elimaı» komandasymen kezdesti. Oıyn 2:2 esebimen aıaqtaldy.
