«Qaırattyń» bapkeri Sýperkýbok qarsańyndaǵy daıyndyq týraly aıtty
ASTANA. KAZINFORM – Almatynyń «Qaırat» klýbynyń bas bapkeri Rafael Ýrazbahtın Qostanaıdyń «Tobylyna» qarsy ótetin Qazaqstan Sýperkýbogy oıyny aldyndaǵy daıyndyǵymen bólisti, dep habarlaıdy Sports.kz.
Bas bapker komanda jańa maýsymnyń bastalýyn asyǵa kútip otyrǵanyn aıtyp, jankúıerlerge tartysty ári sapaly oıyn kórsetýge nıetti ekenin jetkizdi.
– Qaıyrly kesh! Barshańyzdy merekemen, qasıetti Ramazan aıynyń bastalýymen quttyqtaımyn.
Erteńgi matchqa kelsek, biz jańa maýsymnyń bastalýyn taǵatsyzdana kútip otyrmyz. Jankúıerler men stadıonǵa jınalatyn kórermenderdi qýantýǵa tyrysamyz. Sapaly ári tartymdy oıyn kórsetýge kúsh salamyz. Erteń alańda qandaı deńgeıde bolatynymyzdy kóre jatarmyz.
Árıne, bul – maýsymnyń basy. Sondyqtan biz de, «Tobyl» da áli tolyq babyna kelgen joqpyz dep oılaımyn. Degenmen jaqsy oıyn bolady dep kútemiz. Ádette chempıonat bastalar aldynda jankúıerlerdi qyzdyrý úshin daıyndyq sıpatyndaǵy kezdesýler ótedi. Bul match ta sondaı sıpatta ótedi dep oılaımyn. Barshańyzdy maýsymnyń bastalýymen quttyqtaımyn, al erteń bárin alań kórsetedi, – dedi bapker.
Aıta keteıik, Qazaqstan Sýperkýbogy úshin «Qaırat» pen «Tobyl» arasyndaǵy match 28 aqpanda «Astana Arena» stadıonynda ótedi.
Buǵan deıin fýtboldan Qazaqstan kýbogy 1/16 fınalynyń jerebesi tartylǵany habarlanǵan bolatyn.
