«Qaırattyń» Astanadaǵy oıyndaryna bılet nege arzanyraq — klýb málimdemesi

ALMATY. KAZINFORM — «Qaırat» fýtbol klýby bılet baǵasyna qatysty resmı túsindirme jasady.

Buǵan deıin almatylyq klýb Chempıondar lıgasynyń jalpy kezeńinde «Olımpıakos» (9 jeltoqsan), «Brıýgge» (20 qańtar) komandalaryna qarsy óz alańyndaǵy matchtaryn «Astana Arena» stadıonyna kóshiretinin habarlady. Al bılet baǵasy 15 000 - 50 000 teńge aralyǵynda bolady.

«Qaırat» ÝEFA-nyń baǵa saıasatyna sáıkes, Almatydaǵy Ortalyq stadıonda ótetin barlyq oıynǵa bir bılet baǵasy bekitilgendikten, ony qaıta qaraý múmkin bolmaǵanyn málimdedi.

— Almatydaǵy qolaısyz qysqy jaǵdaılarǵa baılanysty matchtardy Astanaǵa aýystyrý sheshimi ÝEFA-men kelise otyryp qabyldandy. Oıyn ornynyń ózgerýi oǵan qatysty talaptardyń da ózgerýine ákeldi. Jańa jaǵdaılardy eskere otyryp, klýbta bılet baǵasyn qaıta qaraý múmkindigi paıda boldy, — delingen klýb málimdemesinde.

Eske salaıyq, «Qaırattyń» óz alańyndaǵy «Real Madrıd» jáne «Pafos» komandalaryna qarsy oıyndarda bılet 30-250 myń teńge aralyǵynda satyldy. Áleýmettik jeli qoldanýshylary dańqty ıspanııalyq klýbpen kezdesýde bılettiń tym qymbat bolýyn qabyldasa da, «Pafosqa» qarsy oıynda dál sol baǵalardyń saqtalýyna narazylyq bildirdi.