«Qaırattyń» 17 jastaǵy oıynshysy «Aqtóbe» qaqpasyna jeńis golyn soqty

ASTANA. KAZINFORM - Búgin fýtboldan Premer-lıga komandalary arasyndaǵy el birinshiliginiń HHІІІ-týrynyń ekinshi oıyn kúni aıaqtaldy. Bul kúni almatylyq «Qaırat» óz alańynda «Aqtóbeni» qabyldady. 

Kezdesý jankúıerler tarapynan erekshe qyzyǵýshylyq týǵyzdy. Almatylyq klýb bıyl bas júldege talasyp jatsa, aqtóbelik komanda úzdik úshtikten kórinýdi kózdeıdi. 

Alǵashqy mınýttan alań ıeleri oıyn tizginin qolda ustaýǵa kúsh saldy. Qarsylastar qaqpasyna jıi shabýyldap, jyldam gol soǵatyn múmkindikti izdedi. Degenmen olardyń qarsylastary qarymta shabýylǵa shyǵýǵa kóńil bóldi. Osyndaı sátterdiń birinde áýelete kelgen dopqa tosqaýyl qoıýǵa árekettengen «Qaırat» qaqpashysy Temirlan Anarbekov jaraqat alyp qaldy. Ony jas fýtbolshy Sherhan Qalmyrza almastyrdy. 

Aıta ketsek, almatylyq klýbtyń negizgi qaqpashysy Aleksandr Zarýtskıı jaraqatyna baılanysty keıingi oıyndarǵa qatysa almaı júr.

Birinshi kezeńde tablodaǵy esepke ózgeris engen joq. Ekinshi kezeńde «Qaırat» shabýylǵa qarqyn qosyp, basymdyqty arttyra tústi. Osyndaı sátterdiń birinde almatylyq shabýylshy Dastan Sátpaev óz múmkindigin múlt jibergen joq. Osylaısha almatylyq klýb qarsylasynan 1:0 esebimen basym túsip, mańyzdy úsh upaıǵa ıe boldy. Olar týrnır kestesinde 49 upaımen birinshi orynǵa kóterildi.

Aıta ketsek, 13 qyrkúıekte «Turan» (Túrkistan) men «Ulytaý» (Jezqazǵan) 1:1 esebine qanaǵat bildirse, «Atyraý» óz alańynda qostanaılyq «Tobyldy» 1:0, petropavldyq «Qyzyljar» Kókshetaýdyń «Oqjetpesin» 3:1, shymkenttik «Ordabasy» astanalyq «Jeńisti» 2:1 esebimen qapy qaldyrdy.

Endi atalǵan týrda «Astana» men «Elimaı» (Semeı) sheberlik baıqasady.
Sondaı-aq 16 qyrkúıekte «Jetisý» (Taldyqorǵan) men «Qaısar» (Qyzylorda) oınaıdy.