«Qaıratpen» qarymta oıynda barlyǵy nólden bastalady — «Anderleht» bapkeri
ALMATY. KAZINFORM — ÝEFA Eýropa lıgasyna irikteýdiń pleı-off kezeńinde «Anderleht» pen «Qaırat» alǵashqy matchyn Almatyda ótkizdi.
Jeńisti oıynnan keıin Belgııa klýbynyń bas bapkeri Vıtor Brýno kezdesý jaıly pikir bildirdi. Ol Almatydaǵy oıyn nátıjesi eýrododa joldamasynyń taǵdyryn áli sheshpegenin aıtty.
— Qarymta oıynda barlyǵy nólden bastalady. Іrikteýde óz alańynda 1:4 esebimen utylsa da, qarymta kezdesýdiń qorytyndysy boıynsha kelesi kezeńge ótip ketken komandalardy kórdik. Fýtboldyń aty — fýtbol. Tarıhta esebi boıynsha taǵdyry sheshilip qoıǵandaı kóringenmen, túrli sebepterge baılanysty kútpegen jerden qaıta oralǵan oıyndar az bolǵan joq. Sol sebepti biz barynsha jınaqy bolyp, qarymta oıynda ne isteýimiz kerektigine nazar aýdarýymyz qajet. «Qaıratty» búgingideı qurmettep, qarymta kezdesýge de dál sondaı bappen shyǵýymyz kerek, — dedi Vıtor Brýno.
Sondaı-aq «Anderleht» bapkeri búgingi oıynda jeńiske jetýge komandanyń joǵary daıyndyǵy sebep bolǵanyn atap ótti. Onyń sózinshe, belgııalyqtar qarsylasyn muqııat zerttegen.
— Men aıtyp ótkendeı, basty faktor — «Qaıratqa» degen qurmetimiz boldy. Jattyǵýlarda keıbir sátterdi pysyqtaýǵa ýaqytymyz az bolǵanyna qaramastan, qarsylasty óte muqııat zerttedik. Alysqa ushý men keshegi jattyǵý kestesine baılanysty keıbir taktıkalyq tustarmen jumys istep úlgermedik. Degenmen, «Qaırattyń» oıynyn egjeı-tegjeıli taldap, beınematerıaldarmen kóp jumys istedik, — dedi ol.
Bapkerdiń aıtýynsha, búgingi goldar komandanyń alańdaǵy júıeli áreketteriniń nátıjesi boldy.
— Ekinshi taımda budan da kóp gol soǵýymyzǵa bolar edi, — dedi Vıtor Brýno.
Baspasóz máslıhaty kezinde Vıtor Brýno Ortalyq stadıondaǵy jasyl jelektiń jaı-úıine qatysty óz oıyn aıtty. Alań kógaly 15 tamyzda ótken Kane Ýesttiń kontsertinen keıin birshama búlingen.
Vıtor Brýno aıtýynsha, kógaldyń jaǵdaıy oıyn barysyna áser etken, alaıda onyń fýtbolshylary bul jaǵdaıǵa beıimdele aldy.
— Alańnyń sapasyna kelsek, árıne, biz árdaıym fýtbolshylar óz sheberligin joǵary deńgeıde kórsete alýy úshin barynsha qolaıly jaǵdaı jasalǵanyn qalaımyz. Kógaldyń sapasy men túri qashan da úlken ról atqaratynyn túsinemiz. Degenmen jaǵdaı oıdaǵydaı bolmaǵan kezde qolda barǵa beıimdelýge týra keledi. Fýtbolshylarymyz dál osylaı jasady, — dedi Vıtor Brýno.
Ol shóptiń jaǵdaıy belgııalyq ujymǵa ádettegideı joǵary qarqynda óner kórsetýge múmkindik bermegenin de atap ótti.
— Mundaı jaǵdaıda dopty únemi jyldam qozǵaltý qıyn, — dep túıindedi bapker.
Eske salaıyq, «Qaırat» óz alańynda «Anderlehtke» 0:3 esebimen ese jiberdi. Eki komanda arasyndaǵy qarymta kezdesý 27 tamyz kúni Brıýsselde ótedi.
