Qaıratker Smaǵul Sadýaqasuly máıitiniń kúli Astanaǵa ákelinedi
ASTANA. 20 qańtar. QazAqparat. 21 qańtar kúni saǵat 5:50-de «Máskeý-Astana» baǵytyndaǵy №874 ushaq reısimen Astana qalasynyń áýejaıyna ulty úshin janyn qurban etken S.Sadýaqasulynyń Máskeýde órtelgen súıeginiń kúli salynǵan ushaq kelip qonady.
Qarsy alý rásiminen keıin ótetin arnaıy mıtıngke I.Elekeev, A.Smaıyl, J.Súleımen, D.Qamzabekuly, S.Qasymov, Q.Aıtýǵanov, Ǵ.Ojarov, S.Jaqsybaı syndy ǵalymdar men S.Sadýaqasulynyń jaqyn týystary bastaǵan 80-ge jýyq adam qatysady.
Qaıratker máıitiniń kúlin jerleý rásimi qashan jáne qaıda bolatyndyǵy týraly san suraqqa osy istiń basy-qasynda júrgen azamattar osynda ótetin baspasóz koferentsııasy barysynda jaýap beredi.
Esterińizge sala keteıik, jýyrda Lev Gýmılev atyndaǵy Eýrazııa ulttyq ýnıversıtetinde ótken «Qaıratker Smaǵul Sadýaqasuly jáne Qazaqstan otanshyldyǵy: eldik murat pen jaýapkershilik» atty ǵylymı-tájirıbelik konferentsııa qorytyndysynda Alash ardaqtysynyń kúlin elge erterek alyp kelý máselesi týraly úkimetke qarar joldanǵan bolatyn.
Oqý ornynda ótken jıynda osydan 77 jyl buryn qaıratker S.Sadýaqasuly máıitiniń kúli Máskeýdiń «Don zıraty» ("Donskoe kladbışe") bas ǵımaratynyń qabyrǵasyna arnaıy ydysqa salynǵan kúıinde qoıylyp, osy kúnge deıin musylmansha jerlenbegeni tilge tıek etildi. Basqosýda Alash ardageriniń kúlin týǵan jerge jetkizý kerektigi jóninde biraýyzdy toqtam jasaldy. Sebebi, erterek qamdanbasa, Máskeýdegi kúl qorabynan da aıyrylyp qalý qaýipi týǵan edi.
20 jasynda - ult jastarynyń kóshbasshysy, 25 jasynda bilim men mádenıetti úılestirgen Aǵartý mınıstri bolǵan Smaǵul Sadýaqasulynyń atqarǵan qyzmeti men tyndyrǵan isi qazaq qaıratkerliginiń etalony ispetti. Ol qazaq jastarynyń tuńǵysh uıymy «Birlik» (1916-1918) pen «Jas azamatta» (1918-1919), Aqmola oblystyq Alashorda komıtetinde (1917-1920), Sibir tóńkeris komıtetinde (1920), Keńestik Kúnshyǵys ulttary jastarynyń ortalyq bıýrosynda (1920), Qazaq avtonomııalyq respýblıkasynyń Jastar odaǵynda (1920), Qazaq OAK tóralqasynda (1920-1921), Búkilreseılik OAK-inde (1920-1921), Semeı gýbernelik tóńkeris komıtetinde (1921), Qazaq OAK Túrkistan avtonomııalyq respýblıkasy ókildiginde (1921), Qazaq avtonomııalyq respýblıkasy Josparlaý komıssııasynda (1923-1924), Halyq aǵartý komıssarıatynda (1925-1927), Qazaq pedagogıka ınstıtýtynda (1927-1928) jaýapty da jetekshi qyzmet atqardy. Jastaı saıasattyń ótinde júrip, otarshyldarmen kúresti. Qyzmette júrip-aq ol «Jas azamat», «Eńbekshil jastar», «Kedeı sózi», «Eńbek týy», «Órteń» gazetteri men «Balapan», «Trýdovaıa Sıbır», «Jas qazaq» jýrnaldarynda qosymsha qyzmet atqaryp (keıbirin ýaqytsha basqaryp), 1924-1925 jyldary «Qyzyl Qazaqstan» (búgingi «Aqıqat») jýrnalyna, 1925-1926 jyldary «Eńbekshi qazaq» (búgingi «Egemen Qazaqstan») gazetine redaktor boldy.
