«Qaıratqashqan» nemese fanat qaıda barasyń?» - BAQ-qa sholý
***
«Qazaqstan Prezıdenti Nursultan Nazarbaev Sankt-Peterbýrgtegi G20 sammıtiniń sessııasynda sóz sóıledi», - dep jazady «Egemen Qazaqstan» gazeti búgingi sanyndaǵy «Daǵdaryspen birlesip kúresý qajet» degen taqyryptaǵy maqalasynda. Basylymnyń jazýynsha, Nursultan Nazarbaev shaqyrýǵa rızashylyǵyn bildirip, jahandyq daǵdarystyń bir sebebi ekonomıkanyń naqty sektorymen baılanyssyz «sabyndy kóbik» túrindegi qarjylyq qurylymdardyń qarqyndy damýy bolyp tabylatynyn atap ótti. Memleket basshysy mańyzdy álemdik sheshimderdi qabyldaý kezinde kóptegen damýshy elderdiń ustanymy is júzinde nazarǵa alynbaıtynyn aıtty. «Qazaqstan tárizdi elderdiń de pikiri elenýi úshin budan eki jyl buryn meniń tarapymnan G-GLOBAL jobasy bastama retinde kóterildi. Ol G8-ge jáne G20-ǵa balama emes, qazirgi kezde aqparattyq-kommýnıkatıvtik alań retinde iske asyrylyp jatqan jahandyq dıalogtyń qosymsha quraly ǵana», - dedi Qazaqstan Prezıdenti.
Bıyl elimizde tuńǵysh ret Elbasynyń Jarlyǵymen qyrkúıektiń 8-inde Otbasy kúni atalyp ótiledi. Budan keıin turaqty túrde ár jyly qyrkúıektiń ekinshi jeksenbisi Otbasy kúnine arnalady. Soǵan oraı, Qazaqstan Respýblıkasy Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Gúlshara Ábdiqalyqovamen «Egemen Qazaqstan» gazeti oı bólisken. Basylymnyń árbir saýalyna tushymdy jaýap bergen G.Ábdiqalyqova: «Otbasy qundylyqtaryn saqtaý jáne nyǵaıtý - Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa qyzmetiniń basty basymdyqtarynyń biri. Sondyqtan, Otbasy kúnin belgileý týraly Jarlyqtyń shyǵýy Ulttyq komıssııanyń osy baǵyttaǵy qyzmetin jandandyra túsýge kómekteseri sózsiz. Otbasy kúnin atap ótý arqyly otbasy qundylyqtaryn nasıhattaý jastar arasynda jahandyq yqpaldasý áserimen qalyptasqan turmys qurýǵa asyqpaý, tipti, salt bastylyqqa umtylý, nekesiz qarym-qatynasta bolý sııaqty keıbir jaǵymsyz ádetterden arylýǵa áser etedi degen oıdamyn», - deıdi.
***
Aq úıdiń Taıaý Shyǵystaǵy nysanyna osy joly Sırııa ilikti. AQSh Senatynyń halyqaralyq ister boıynsha komıteti prezıdent Barak Obamanyń kezekti arab eline áskerı operatsııa jasaý bastamasyn qoldady. Bul geosaıası oıynnyń arty nege soqtyrýy múmkin? «Aıqyn» gazetiniń osy jáne basqa da saýaldaryna jaýap bergen saıasattanýshy Muhıt Asanbaev: «AQSh-tyń Sırııaǵa shabýyly tek áýe arqyly bolatyn tárizdi. Áýedegi operatsııa qysqa merzimde ótýi múmkin, al onyń negizgi nysany - Sırııanyń áýe qorǵanys kúshteri men áýe ınfraqurylymy. Sonymen qatar ókimet pen prezıdent saraıy sııaqty resmı bılik ǵımarattary da nysanǵa iligýi yqtımal. Al jerdegi áskerı operatsııany tek sırııalyq qarýly oppozıtsııa men oppozıtsııa atyn jamylyp júrgen sheteldik legıonerler men lańkestik uıymdar ǵana jalǵastyrady. Áýe soqqysynan keıin Batys elderi olarǵa kórsetip otyrǵan áskerı tehnıkalyq kómekti edáýir ulǵaıtady», - deıdi. Suhbat «Sırııa syr bermeı tur» degen taqyryppen berilgen.
Osy basylymda Eýrazııa gýmanıtarlyq ınstıtýtynyń rektory, tarıh ǵylymdarynyń doktory, professor Amangeldi Qusaıynovpen aradaǵy suhbat «Jip túıinsiz, sóz shyndyqsyz baılanbas» degen taqyryppen berildi. Ǵalymnyń paıymynsha, qazir «búgin aıǵa boıym, erteń kúnge qolym jetedi» deıtinderdiń zamany. Ash otyryp, as tańdap, jaıaý otyryp, at tańdaıtyndaı kezeńge de jettik.«Qaıtsek ult bolamyz?» degen suraqtyń ózekti máselege aınalýy tekten-tek emes. «Ózim úshin týyppyn, ultym úshin ólippin» deıtinderdiń qatary saýsaqpen sanarlyq qana. Rýshyldyq, jerlestik degen jegi qurttar semirip, qoń jınaǵany sonshalyq, kózi ashyq azamattar amalsyz «biz qashan tolyqqandy ult bolamyz?» dep dabyl qaǵyp otyr. «Zaman jáne qoǵamnyń qıynshylyqtary, tipti túrli teperish adamdy shyńdaıdy. Ertis boıynyń keshegi kórgen quqaıy men búgingi qıyndyqtary qazaqtan birlikti, eldikti talap etti. Táýelsizdik tusynda buǵan oılanyp qaraýymyz kerek. Ult zııalylyǵynyń altyn besigi Almaty - ómirimizde orny bólek qala. Men Alataýdaǵy asqaq qalanyń oqyǵandary Shoqan eskertkishiniń túbinde, alyp báıterekter kómkergen parkterde saryýaıymǵa salynbaı, jaqsy áńgime aıtatyn kúnder týady esepteımin», - dep tarqatady oıyn A.Qusaıynov.
***
Adam juldyzǵa aınalǵanda ózi emes, qorshaǵan ortanyń oǵan degen kózqarasy ózgeredi. ıAǵnı ánshi, bıshi, kúıshi bolsyn meıli «juldyz aýrýyna» ushyrasa, onda oǵan jalǵyz ózi ǵana emes, belgili bir deńgeıde aınalasy da kináli degen sóz. Buryndary «Bred Pıttiń tabynýshylary búıtipti» nemese «Maıkl Djeksonnyń fanattary sóıtipti» degendi estýshi edik, ıaǵnı ne shyqsa da shetelden shyǵatyn. Sol kúnniń kózdi ashyp-jumǵansha qazaqqa da jetkeni... Bul jaıynda «Alash aınasy» gazetiniń búgingi sanyndaǵy «Qaıratqashqan» nemese fanat qaıda barasyń?» degen taqyryptan keńinen bile alasyzdar.
