«Qaırat» ekinshi jyl qatarynan Qazaqstan chempıony boldy
ASTANA. KAZINFORM — Almatylyq «Qaırat» fýtboldan 2026 jylǵy Qazaqstan chempıony atandy.
Bıyl el birinshiliginde sońǵy týrǵa deıin jeńimpaz anyqtalǵan joq. Bas júldeden almatylyq «Qaırat» pen elordalyq «Astana» negizgi úmitker boldy. Dop dodasynyń bitýine bir týr qalǵanda «Qaırat» 58 upaımen birinshi orynda, al «Astana» 56 upaımen ekinshi orynda turdy.
Bul oıynda almatylyq komanda kem degende teń nátıjege qol jetkizse, ekinshi jyl qatarynan chempıon bolatyn múmkindigi bar. Al elordalyq klýb úshin tek jeńis qajet.
Kezdesý barysynda «Astana» birden alǵa qaraı umtyldy. Oıynnyń 15-mınýtynda elordalyq klýbtan Marın Tomasov mergendik tanytyp, óz komandasyn alǵa shyǵardy. Tarazy basyn teńestirýge umtylǵan «Qaırat» birinshi kezeńde degenine jete alǵan joq.
Chempıondyq ataqtyń qoldan sýsyp bara jatqanyn túsingen almatylyq fýtbolshylar ekinshi kezeńde shabýylǵa kóbirek kóńil bóldi. Nátıjesinde 56-mınýtynda Dastan Sátpaev birinshiliktegi óziniń 14 golyn soqty.
Aıta ketsek, bıyl «Qaırat» chempıon atansa, odan keıingi oryndarǵa «Astana» men «Tobyl» taban tiredi.
Ózge oıyndar nátıjesi tómendegishe:
«Aqtóbe» - «Ordabasy» (Shymkent) 2:2
«Elimaı» (Semeı) - «Atyraý» 3:2
«Jeńis» (Astana) - «Qaısar» (Qyzylorda) 2:2
«Jetisý» (Taldyqorǵan) - «Qyzyljar» (Petropavl) 0:1
«Oqjetpes» (Kókshetaý) - «Turan» (Túrkistan) 4:3
«Ulytaý» (Jezqazǵan) - «Tobyl» (Qostanaı) 2:2
Eske salsaq, budan buryn Qazaqstan Premer-lıgasyna joldama alǵan 3 komanda belgili boldy.
Mundaı múmkindikke «Kaspıı» (Aqtaý), «Ertis» (Pavlodar), «Altaı» (Óskemen) komandalary qol jetkizdi.