Qaırat Joldybaıuly sheshim qabyldaýdyń úsh qaǵıdasyn aıtty
ALMATY. KAZINFORM – Book Fest 2025 aıasynda teolog, jazýshy Qaırat Joldybaıulynyń qatysýymen ótken kezdesýde bala tárbıesi, oǵan erkindik berý, emotsııany taný men durys sheshim qabyldaý taqyryptary talqylandy.
Qaırat Joldybaıulynyń aıtýynsha, qazirgi ata-analar jıi jiberetin qateliktiń biri – balanyń ómirin óz qalaýynsha baǵyttaý.
– Kóp ata-ana óz oryndalmaǵan armanyn baladan kórgisi keledi. «Myna fakýltetti tańda, bolashaqta dáriger bolasyń, munaıshy bolasyń» dep balanyń erkin sheshimin shekteıdi. Biraq balaǵa tańdaý erkindigin berý – eń mańyzdy nárse, - dedi ol.
Ol qazirgi mektepterde kásibı baǵdar berýge arnalǵan baǵdarlamalar bar ekenin atap ótti. Mundaı júıe balanyń qabileti men qyzyǵýshylyǵyn anyqtaýǵa múmkindik beredi.
– Qarapaıym kıim tańdaýda da erkindik kerek. «Mine, bıýdjetiń – osy, qalaǵanyńdy al» dep úıretý kerek. Bala bir ret qatelesedi, biraq sol arqyly sheshim qabyldaýdy úırenedi. Ómir boıy óz isine senimdi bolýdy qazirden bastaý qajet, - dedi teolog.
Qaırat Joldybaıulynyń aıtýynsha, balanyń sheshim qabyldaýǵa daǵdylanbaýy keıin óz betinshe ómir súrýge kedergi bolady.
– Keıbir eresekter áli kúnge deıin kıim tańdaı almaıdy, sebebi bala kezinde olardyń ornyna ata-anasy sheshim qabyldap kelgen. Mundaı adam ómir boıy bireýdiń maquldaýyn kútip ótedi, - dedi ol.
Kezdesý barysynda spıker emotsıonaldyq ıntellekt pen ishki tepe-teńdik týraly da aıtty. Ol jastardy qandaı da bir sheshim qabyldaıtyn kezde emotsııa jeteginde ketpeı, sabyrmen oılanýǵa úndedi.
– Adam ashýly ne qatty qýanyp turǵanda sheshim qabyldamaýy kerek. Sol sátte kidirip, sabyrǵa kelý mańyzdy. Emotsııamen qabyldanǵan sheshimniń sońy ókinishke ákelýi múmkin. Óz sezimińdi tanı bilýiń kerek, - dedi ol.
Sondaı-aq, teolog sheshim qabyldaýdyń basty qaǵıdalaryn atap ótti:
• Kidiris jasaý – emotsııadan arylǵan soń ǵana sheshim qabyldaý.
• Bilimge súıený – máseleni zertteý, biletin adamdarmen aqyldasý.
• Júrekke úńilý – ar-ojdan men meıirimge súıený.
– Sheshim qabyldarda tek aqylmen emes, júrekpen de oılaný kerek. Keıde júrektiń úni durys jolǵa salady. Tipti sheshimiń durys bolmaı shyqsa da, ókinbe. Sebebi sol arqyly ómir saǵan sabaq beredi. Bul da – taǵdyr, - dep túıindedi Qaırat Joldybaıuly.
Eske salaıyq, buǵan deıin Meloman/MARWIN dúkender jelisi 2025 jylǵy 1–31 qazan aralyǵynda óziniń barlyq qalalardaǵy dúkenderinde dástúrli BOOKFEST 2025 kitap festıvaliniń ótetinin habarlaǵan edi.
BOOKFEST kitap festıvali Meloman/MARWIN jelisi tarapynan 2020 jyldan beri ótkizilip keledi jáne osy ýaqyt ishinde Qazaqstandaǵy eń iri kitap ındýstrııasyna aınaldy. Jyl saıyn festıval oqyrmandardy, avtorlardy, baspagerlerdi jáne kásipkerlerdi biriktirip, dıalogqa, bilim almasýǵa jáne oqý mádenıetin ilgeriletýge arnalǵan keńistik qalyptastyrady.