Qaırat Turlyhanov Halyqaralyq aýyr atletıka federatsııasynyń vıtse-prezıdentiginen úmitker
ASTANA. 16 mamyr. QazAqparat - 20-22 mamyr aralyǵynda Máskeýde Halyqaralyq aýyr atletıka federatsııasynyń (IWF) kongresi ótedi. Oǵan osy salanyń basy-qasynda júrgen barlyq laýazym ıeleri qatysady.
Kún tártibinde kóptegen máseleler tur. Sonyń arasyndaǵy eń negizgisi - atalmysh uıymnyń prezıdenti, vıtse-prezıdentteri jáne ózge de basshylyq qyzmet atqaratyn basqa da laýazym ıelerin saılaý. Baq synaýǵa bel býǵandar arasynda Qazaqstan Respýblıkasy aýyr atletıka federatsııasynyń prezıdenti, Azııa konfederatsııasynyń vıtse-prezıdenti Qaırat Turlyhanov ta bar. «2001 jyldan beri osy qyzmettiń tizginin ustaǵan ol sol ýaqyt aralyǵynda kóptegen sharýa tyndyrǵanyn dúıim jurt jaqsy biledi. Eń bastysy, osy sport túrindegi kúrmeýi kóp máseleler sheshilip, tyǵyryqqa tirelgen salada tyń serpilis baıqaldy. Otandastarymyz Olımpıada oıyndary men álem chempıonaty sekildi dúbirli dodalarda mol oljaǵa keńelip qana qomaı, komandalyq esepte tańdaı qaǵarlyq nátıjege qol jetkizdi. Azııa oıyndary, Azııa chempıonaty jáne basqa da asa iri halyqaralyq jarystarda únemi úzdikter qatarynan kórindi. Osyndaı ereń eńbektiń arqasynda Qazaqstannyń ziltemirshileri búgingi tańda álemdegi mańdaıaldy komandalardyń sanatyna erkin qosylyp otyr»,-delingen taratylǵan málimette.
Qazirgi kezde osy qyzmettiń tizginin ustaýǵa 40 úmitker óz ótinishin bildirgen eken. Bul másele taıaý kúnderi Máskeýde ótetin Kongress barysynda sheshiletin bolady.
