«Qaırat» shaǵynaýdanyna gaz berý nelikten toqtatyldy - Almaty ákimdiginiń jaýaby
ALMATY. QazAqparat – Almaty qalasynyń ákimdigi «Qaırat» shaǵynaýdanynda turǵyn úılerdiń gazdan ajyratylý sebebin túsindirdi, dep habarlaıdy QazAqparat.
Ákimdik usynǵan aqparatqa súıensek, keshe saǵat 13:30-da júk kóliginiń júrgizýshisi ortasha qysymdy gaz magıstraline soǵylyp, «Qaırat» shaǵynaýdandaǵy birqatar úıge gaz berý toqtatylǵan. «Baımaq» JShS-ge tıesili jeke gaz jelilerin jóndeý máselesi jedel sheshilýde.
«Avarııalyq-qalpyna keltirý jumystary 3 saǵattan astam ýaqytqa sozyldy. Sodan soń jelilerdi iske qosý bastaldy. Alaıda jóndeý brıgadalary gazben turaqty qamtýdy tolyq kólemde qamtamasyz ete almady.
Aýdan ákimdigi men «QazTransGaz Aımaq» AQ qyzmetkerleri shaǵynaýdan turǵyndarymen kezdesip, túsindirý jumystaryn júrgizdi. Odan ári úılerdi aralap shyqty», - delingen vedomstvo habarlamasynda.
Málimetke súıensek, saǵat 01:30-da 135 abonent gazǵa qosylǵan.
«Qalǵan 52 abonent boıynsha: jelide gaz qubyrlarynyń bitelýi anyqtaldy. Olardy joıý úshin negizgi magıstraldy ajyratý qajet boldy (qaýipsizdik tehnıkasyna sáıkes túngi ýaqytta dánekerleý jáne iske qosý jumystary júrgizilmeıdi).
Apatty joıý jumystary búgin kúndizgi ýaqytta da jalǵasatyny týraly shaǵynaýdan turǵyndaryna túsinikteme berildi», - dedi ákimdikten.
