Qaırat - Seltık: avtobýstar ortalyq stadıonǵa jankúıerlerdi tegin tasıdy
ALMATY. KAZINFORM — 26 tamyz kúni saǵat 21:45–te Almatynyń Ortalyq stadıonynda ÝEFA Chempıondar lıgasynyń pleı-off kezeńi aıasynda «Qaırat» pen «Seltık» arasynda qarymta oıyn ótedi.
Almaty ákimdiginiń málimetinshe, jankúıerlerge qolaıly jaǵdaı jasaý úshin joǵary jyldamdyqtaǵy ınternet, qosalqy elektr qýaty, medıtsınalyq kómek, sanıtarlyq ınfraqurylym jáne ekologııalyq múmkindikter qarastyrylǵan.
Odan bólek jankúıerlerdiń yńǵaıy úshin saǵat 18:00–den bastap qalanyń negizgi núktelerinen stadıonǵa jáne keri baǵytta tegin avtobýstar qatynaıdy:
- «Qalqaman» yqsham aýdany (№ 7 qalalyq aýrýhana aıaldamasy);
- «Orbıta» yqsham aýdany (Mustafın — Toraıǵyrov kósheleriniń qıylysy);
- «Aınabulaq» yqsham aýdany (Maqataev — Pavlodar kósheleriniń qıylysy);
- «Halyq Arena» aıaldamasy (soltústik baǵyt);
- Almaty-1 temirjol vokzaly;
- Almaty-2 temirjol vokzaly;
- Naýryzbaı aýdandyq HQKO;
- Momyshuly — Móńke bı kósheleriniń qıylysy.
Stadıon esigi jankúıerler úshin saǵat 18:45–te ashylady.
Jalpy «Qaırat» — «Seltık» matchynda qaýipsizdikti 1,5 myń polıtsııa qyzmetkeri qamtamasyz etedi.
Buǵan deıin «Qaırat» — «Seltık» matchyna alypsatarlar bıletti 5 myńnan 100 myń teńgege deıin satyp jatqanyn jazǵanbyz.