«Qaırat» - «Seltık»: alypsatarlar bıletti 5 myńnan 100 myń teńgege deıin satyp jatyr

ALMATY. KAZINFORM – 26 tamyz kúni Almatynyń Ortalyq stadıonynda «Qaırat» pen «Seltık» komandalary arasynda oıyn ótedi.

Fýtboldan UEFA Chempıondar lıgasy pleı-off kezeńiniń alǵashqy kezdesýinde «Qaırat» syrt alańda shotlandııalyq «Seltık» komandasymen teń tústi.

Endi almatylyq komanda óz alańynda Chempıondar lıgasy toptyq kezeńine joldama úshin baq synaıdy.

Ortalyq stadıonda ótetin match bıletteri 19 tamyz kúni satylymǵa shyǵyp, birneshe saǵattyń ishinde ótip ketti.

«Qaırat» fýtbol klýbynyń málimetinshe, bıletke 100 myńǵa jýyq ótinim túsken. Degenmen, áleýmettik jelilerde adamdar bıletterdiń biraz bóligin alypsatarlardyń alyp qoıǵanyn jáne ony qymbat baǵaǵa qaıta satyp jatqanyn aıtyp shaǵymdandy.

Osy oraıda, matchqa deıin bir kún buryn bıletterdiń adam qolynan qanshaǵa satylyp jatqanyn anyqtap kórdik. OLX saıtynda «Qaırat» - «Seltık» oıyn bıletterine qatysty habarlandyrý kóp. Olardyń baǵasy 5 myńnan bastalyp 100 myńǵa deıin barady. Eń qymbat bılet – 200 myń. Habarlandyrýda Shyǵys trıbýnanyń 42-sektoryndaǵy eki oryn dál osyndaı baǵada satylatyny kórsetilgen. Odan bólek 26-sektor bıleti 50 myńǵa, 33-sektor bıleti 80 myńǵa satylyp jatyr. Baǵasy 20 myń bolatyn bıletter de bar. Keı habarlandyrýda bıletterdiń match kúni stadıon janynda qolma-qol beriletini jazylǵan. Alaıda biraz bóligi WhatsApp jelisi arqyly saýdalanady.

Alypsatarlyqqa qarsy kúres

Bıletterge qatysty shaǵymnan keıin «Qaırat» fýtbol klýby resmı málimdeme jasady.

Klýb málimetinshe, resmı saıt pen Ticketon arqyly satyp alynǵan bılet jankúıerlerdiń elektrondyq poshtasyna tek match kúni joldanady. Qairat SuperApp-ta QR-kod oıyn bastalarǵa birneshe saǵat qalǵanda avtomatty túrde jańartylady. Áleýmettik jelilerde nemese úshinshi taraptan taraǵan skrınshottar men sýretter jaramsyz bolady.

- Klýb bıletterdiń alypsatarlar arqyly qaıta satylyp jatqanyn tirkeýde. Mundaı bıletterdiń kúshi joıylady. Stadıonǵa kirerde kúmán týyndaǵan jaǵdaıda stıýardtar satyp alý kezinde kórsetilgen JSN-dy talap etip, bılet ıesiniń kim ekenin teksere alady. Rastalmaǵan jaǵdaıda kirýge ruqsat berilmeıdi. Match kúni klýb quqyq qorǵaý organdarymen birlesip baqylaýdy kúsheıtip, alypsatarlyqqa qarsy kúresti jalǵastyrady. Jankúıerlerdi bıletti tek resmı arnalar arqyly alýǵa shaqyramyz, – dep habarlady «Qaırat» FK.

Sondaı-aq ÝEFA-nyń rezervten qaıtarylǵan bıletterdiń esebinen klýbqa shamamen 1000 oryn qaıtarylǵan. Olar búgin saǵat 13:00-de satylymǵa shyǵady. Bul joly bir adam tek bir bılet ala alady.

Eske salaıyq, buǵan deıin Djeı Lonyń kontsertinde jalǵan bılet satqan kúdikti ustalǵanyn jazǵanbyz.