Qaırat Satybaldy áskerı sheninen aıyrylyp, memlekettik ordenderdi qaıtarýǵa mindetteldi

ASTANA. QazAqparat – 6 jylǵa sottalǵan Qaırat Satybaldy general-maıor sheninen aıyrylyp, memlekettik ordenderdi keri qaıtarýǵa mindetteldi, dep habarlaıdy QazAqparat tilshisi.

«Prezıdentke Qaırat Satybaldyny Ulttyq qaýipsizdik organdarynyń general-maıory ataǵynan, sondaı-aq «Qurmet» jáne «Parasat» ordenderinen aıyrý týraly usynys engizilsin», - dedi Astana qalasy Baıqońyr aýdandyq №2 sotynyń sýdıasy Nurlan Baıahmetov sot otyrysynda.

Buǵan deıin habarlaǵanymyzdaı, búgin Qaırat Satybaldyǵa sot úkimi shyǵyp, ol 6 jylǵa sottaldy.

«Kúdikti Qaırat Satybaldyulyn alty jylǵa bas bostandyǵynan aıyrý týraly sheshim qabyldandy. Sonymen qatar jeke múlki tárkilenedi», - degen edi Nurlan Baıahmetov ZOOM platformasynda ótken sot otyrysynda.

Q. Satybaldy jazasyn qylmystyq-atqarý júıesiniń qaýipsizdigi ortasha mekemesinde óteıdi.

Buǵan deıingi sot protsesinde prokýror kúdiktini 6 jylǵa bas bostandyǵynan aıyrýdy suraǵan edi. Qaırat Satybaldy bıylǵy 13 naýryzda qamaýǵa alynǵan bolatyn.

Ashyq kózderden alynǵan foto