Qaırat Satybaldyǵa tıesili bolǵan Almatydaǵy bıznes-ortalyq taǵy da satylmaı qaldy
ASTANA. KAZINFORM – Buryn Qaırat Satybaldynyń ıeliginde bolǵan Kaisar Plaza saýda-keńse ortalyǵyn satý boıynsha elektrondy aýktsıon taǵy da ótpeı qaldy.
14 shildege josparlanǵan aýktsıonǵa birde-bir qatysýshy tirkelmegen. Nysan baǵany kóterý ádisimen satylymǵa shyǵarylǵan.
Saýda-keńse ortalyǵynyń bastapqy baǵasy 47 mlrd 344 mln 75 myń 556 teńge (QQS-syz) bolyp belgilengen. Al aýktsıonǵa qatysý úshin 7,1 mlrd teńgeden astam kepildik jarna engizý talap etilgen.
2017 jyly salynǵan toǵyz qabatty ǵımarattyń jalpy aýmaǵy 63 920 sharshy metr. Ol Almaty qalasynyń Almaly aýdanyndaǵy Jeltoqsan kóshesi, 115 mekenjaıynda, 0,7209 gektar jer teliminde ornalasqan.
Qazir nysan «KÝVA» JShS-niń enshiles uıymynyń senimgerlik basqarýynda. Bıznes-ortalyq qalypty jumysyn jalǵastyryp otyr. Onda 53 jalǵa alýshy bar.
Eske salaıyq, bıyl aqpan aıynda da bul kommertsııalyq ǵımarat satylymǵa shyǵarylǵan bolatyn. Sol kezde onyń bastapqy baǵasy 61,5 mlrd teńge bolǵan. Alaıda satyp alýshy tabylmaǵandyqtan, aýktsıon ótpedi.
Aıta keteıik, 2024 jyly Sybaılas jemqorlyqqa qarsy qyzmet memleketke qaıtarylǵan Qaırat Satybaldynyń birqatar aktıvi týraly aqparat jarııalaǵan edi. Olardyń qatarynda Kaisar Plaza bıznes-ortalyǵy, ákimshilik ǵımarattar, eksklıýzıvti zergerlik buıymdar, elıtalyq jyljymaıtyn múlik nysandary, páterler men avtokólikter, kompanııalardaǵy aktsııalar men qatysý úlesteri, temirjol jelileri, sondaı-aq shetelden qaıtarylǵan aktıvter men aqshalaı qarajat bar.
Memleketke qaıtarylǵan bul aktıvterdiń jalpy quny 732,8 mlrd teńge bolǵan.
