Qaırat Satybaldydan tárkilengen Almatydaǵy bıznes ortalyǵy saýdaǵa shyǵaryldy
ASTANA. KAZINFORM – «Qaıtarylǵan aktıvterdi basqarý kompanııasy» JShS Almatydaǵy bıznes ortalyqtardyń birin aýktsıonǵa shyǵardy. Kaisar Plaza saýda-keńse ortalyǵy buryn Qaırat Satybaldyǵa tıesili bolǵan.
Bul habarlandyrý Memlekettik múlik tiziliminiń sauda.e-qazyna.kz portalynda jarııalandy. Onda nysannyń bastapqy baǵasy 61 547 298 223 teńge dep kórsetilgen. Sondaı-aq, kepildik jarnasynyń somasy da jazylǵan, ıaǵnı 9 232 094 734 teńge. Al ótinim qabyldaý 2026 jyldyń 7 sáýirinde saǵat 09:55-ke deıin jalǵasady.
Sonymen qatar, habarlandyrýda saýda-keńse ortalyǵynyń Jeltoqsan kóshesinde ornalasqany, 9 qabatty jáne jalpy aýdany 63 920 sharshy metr ekeni jóninde málimet bar. Budan bólek ǵımaratty 53 jalǵa alýshy ártúrli merzimge jalǵa alǵany qamtylǵan.
Esińizge salaıyq, 2024 jyldyń tamyz aıynda Qaırat Satybaldy memleketke 732,8 mlrd teńgeniń aktıvterin qaıtarǵanyn habarlaǵan edik.
Alpamys Faızolla