Qaırat Satybaldy isi: Antıkor 44,6 mlrd teńge qarajatty qaıtardy
ASTANA. KAZINFORM - Sybaılas jemqorlyqqa qarsy qyzmet Qaırat Satybaldyulyna qatysty qylmystyq isterdi tergeý sheńberinde memleketke 2024 jyldyń basynan bastap qosymsha 44,6 mlrd teńge qaıtardy.
Antıkor tóraǵasy Ashat Jumaǵalı El Prezıdenti Q. Toqaevtyń Úkimettiń keńeıtilgen otyrysynda aıtylǵan tapsyrmalaryn iske asyrý boıynsha qurylymdyq jáne aýmaqtyq departament basshylarymen jedel keńes ótkizdi.
Memleket basshysy atap ótkendeı, zańsyz shyǵarylǵan aktıvterdi qaıtarý ınvestıtsııalardyń taǵy bir kózi bolýy tıis.
Sybaılas jemqorlyqqa qarsy qyzmet Qaırat Satybaldyulyna qatysty qylmystyq isterdi tergeý sheńberinde memleketke 2024 jyldyń basynan bastap qosymsha 44,6 mlrd teńge qaıtaryldy.
Qazirgi ýaqytta qarajat memleketke keltirilgen zalaldy óteý esebinen respýblıkalyq bıýdjetke jiberildi.
Sonymen qatar, Prezıdent ekonomıkaǵa jańa serpin berý úshin kásipkerlermen jáne ınvestorlarmen tolyqqandy seriktestik qurý qajettigine nazar aýdardy.
Bir jyl buryn Antıkormen bıznesti qorǵaý jumysy aıasynda «Bızneske jol» jobasy iske qosyldy.
Ol jergilikti jerlerde kásipkerliktiń damýyna kedergi keltiretin júıeli ákimshilik kedergilerdi joıýǵa arnalǵan.
Joba iske qosylǵan sátten bastap 600-den astam problemalyq keıs sheshilip, 30 myńǵa jýyq kásipkerge kómek kórsetildi.
Sondaı-aq, Prezıdent Qasym-Jomart Toqaev óz sózinde jemqorlyq áli de ekonomıkanyń damýyn tejeıtin faktorlardyń biri bolyp qala beretinin atap ótti. Bul baǵytta tsıfrlyq tehnologııalardy, onyń ishinde «aqshany boıaý» jáne «tsıfrlyq teńgeni» qoldaný tetikterin odan ári engizý mańyzdy bolyp tabylady.
Memleket basshysynyń tapsyrmasyna sáıkes jáne sybaılas jemqorlyqqa qarsy saıasat Tujyrymdamasyn iske asyrý sheńberinde Agenttik Qarjy mınıstrligimen jáne Ulttyq Bankpen birlesip osy quraldardy engizýdi jalǵastyrady.
Qazirgi ýaqytta «aqshany boıaýdy» pılottyq engizý úshin avtojoldar salý, aýyl sharýashylyǵy tehnıkasy men jabdyqtaryn satyp alý, sondaı-aq Áleýmettik-kásipkerlik korporatsııalardyń qarajatyn paıdalaný salalary aıqyndalǵan. Antıkor basshysynyń aıtýynsha, Prezıdent tapsyrmasyna sáıkes, bul protsess nysandardyń qurylys salasyna da taralatyn bolady.
A. Jumaǵalı: «bıýdjetten bólingen qarjy túpki maqsatyna jetýi kerek. Bizdiń súıemeldeýimizdegi qurylystary uzaqqa sozylǵan nysandardyń ýaqtyly berilmeı, sapasyz salynýy kóbine aqshany jymqyrý nemese sheneýnikterge odan ári keri qaıtarý saldarymen jáne basqa da quqyqbuzýshylyqtarmen baılanysty ekenin bárimiz bilemiz.
Tsıfrlyq teńge qural retinde «aqshany boıaý» ınstıtýtyn iske asyrýǵa septigin tıgizedi. Tsıfrlyq teńgeniń algorıtmderi bolǵandyqtan, óziniń izderi bar. Mysaly, qarajat jalaqyǵa bólinse, basqa baǵytqa ketpeı, eńbekaqy, taýarlar men qyzmetterdi satyp alý jáne salyq tóleý boıynsha ıgeriledi.
Bólingen qarjy qozǵalysynyń rásimderi ashyq bolyp, barlyq aýdarym óz maqsatyna jetip, ár teńge kózdelgen maqsatyna jumsalýy tıis», - dedi.
