Qaırat Satybaldy qonaqúıi bolǵan: Almatyda jańa AI-hab qandaı bolady
ALMATY. KAZINFORM — Almatyda IT jáne jasandy ıntellekt salasyn damytýǵa arnalǵan eki iri ortalyq qurylady.
Almaty ákimdiginiń málimetinshe, qalada eki iri joba júzege asyrylyp jatyr. Onyń ishinde Kóktem-3 shaǵynaýdanynda Almaty AI Hub ortalyǵy qurylmaq. Bul nysan buryn Qaırat Satybaldyǵa tıesili qonaqúı bolǵan.
Búginde aýdany 9,4 myń sharshy metrden asatyn ǵımaratty qaıta jańǵyrtý bastalǵan. Nysan 556 jumys orny bar kópfýnktsıonaldy ortalyqqa aınalady.
— Munda IT jáne jasandy ıntellekt kompanııalaryna, startaptar men ázirleýshilerge arnalǵan keńistikter, bilim berý alańdary, kovorkıngter, keńseler, konferents-zaldar men is-sharalar ótkizý aımaqtary ornalasady. Hab quramyna jasandy ıntellekt mektebi men AI Campus ınfraqurylymy da kiredi. Sondaı-aq robototehnıka ekojúıesin qurý kózdelgen, — dep habarlady ákimdikten.
Ekinshi joba — Almaty AI Park. Ony 4,9 gektar jerge salý josparlanǵan. Keshenniń jalpy aýdany shamamen 76 myń sharshy metr. Joba eki kezeńde júzege asyrylady. Birinshi kezeńdi 2027 jyly jeltoqsanda, al ekinshisin 2028 jyly jeltoqsanda aıaqtaý kózdelgen.
— Almaty AI Park quramyna ǵylymı-zertteý jáne jasandy ıntellekt zerthanalary, tehnologııalyq kompanııalardyń keńseleri, kovorkıng, akselerator men bıznes-ınkýbator, sondaı-aq bilim berý jáne is-sharalar ótkizý ınfraqurylymy kiredi. Budan bólek, tehnologııalyq klasterdiń ózinde mamandar daıarlaıtyn ýnıversıtet ashý josparlanǵan, — dep habarlady Almaty ákimdigi.
Eske salaıyq, buǵan deıin Almatyda Qaırat Satybaldyǵa tıesili bolǵan qonaqúıge jańa ınvestor tabylǵanyn jazǵanbyz.
Sonymen qatar Almatyda Qaırat Satybaldyǵa tıesili bolǵan taǵy bńr qonaqúı aýktsıonǵa qoıyldy. Biraq nysanǵa ázirge satyp alýshy tabylmady.
