Qaırat Sarybaı: Nursultan Nazarbaev – álemdik deńgeıdegi saıasatker
Azııadaǵy ózara is-qımyl jáne senim sharalary jónindegi keńes hatshylyǵynyń atqarýshy dırektory Qaırat Sarybaıdyń aıtýynsha, AÓSShK ıdeıasyn Nursultan Ábishuly alǵash ret 1992 jyldyń qazan aıynda BUU Bas Assambleıasynyń 47-sessııasynda usynǵan.
Uıymnyń 30 jyldyǵynda VI Sammıt Qazaqstanda ótedi.
«Elbasynyń bul bastamasy ashyq, transparentti, ınklıýzıvti, evolıýtsııalyq jáne halyqaralyq quqyqtyń jalpyǵa birdeı tanylǵan qaǵıdattaryna negizdelgen óńirlik qaýipsizdik arhıtektýrasy boıynsha dıalogqa arnalǵan azııalyq platformanyń irgetasyn qalady jáne barlyq memleketterdiń beıbit qatar ómir súrýine jaǵdaı jasaıdy», - dedi AÓSShK hatshylyǵynyń atqarýshy dırektory Qaırat Sarybaı.
Búginde AÓSShK 27 elge deıin ósti jáne múshe memleketterdiń jıyntyq aýmaǵy álem halqynyń jartysynan astamy turatyn Azııa qurlyǵynyń shamamen 90%-yn qamtıdy. AÓSShK-ge múshe memleketterdiń úlesine álemdik JІÓ-niń 50%-dan astamy tıesili jáne olar jahandyq ekonomıkalyq ósýdiń úshten ekisin generatsııalaıdy. 2018 jyly Hatshylyq tolyǵymen Nur-Sultan qalasyna kóshirildi. Osylaısha, dáıekti evolıýtsııalyq damý nátıjesinde AÓSShK tolyqqandy uıymdastyrýdyń negizgi belgilerine ıe boldy.
«Dáıektilik pen boljamdylyq, sonymen qatar tarıhı jáne ózekti tájirıbeni tyńǵylyqty taldaýǵa negizdelgen batyl ınnovatsııalyq tásilder, saıası kóregendilik daryny, meniń oıymsha, saıası kóshbasshylar, memlekettik qaıratkerler jáne olar ókildik etetin ulttar men halyqaralyq uıymdar tarapynan Elbasyna tereń senimniń basty quramdas bóligi boldy. Al shyn máninde, bul senim Nursultan Nazarbaevtyń jahandyq aýqymdaǵy saıasatker ekenin halyqaralyq deńgeıde moıyndaýǵa ulasty. Konferentsııamyzdyń aldyńǵy qurmetti spıkerleri atap ótken Uly dala eli - Qazaqstannyń qonaqjaı jerindegi joǵary deńgeıdegi halyqaralyq kezdesýler nemese Qazaqstannyń Tuńǵysh Prezıdentiniń qatysýymen ótetin ózge de halyqaralyq formattar Qazaqstan úshin ǵana emes, halyqaralyq qoǵamdastyq úshin de aıtýly oqıǵa qarsańynda bizdiń búgingi kezdesýimizdiń taqyrybyn aıqyndap, bekite túsedi. Meniń oıymsha, AÓSShK aıasynda byltyr Dýshanbede ótken AÓSShK 5-shi sammıtinde Qazaqstan Prezıdenti Qasym-Jomart Toqaev usynǵan forýmnyń negizin qalaýshy retinde Nursultan Nazarbaevtyń basty ról atqaratyn Danalar keńesin qurý týraly bastama keńeske múshe elderdiń tıisti baǵasyn tabady»,-dep qorytyndylady Sarybaı.
