«Qaırat» sapynan negizgi quramdaǵy eki oıynshy ketti
ASTANA. KAZINFORM - Almatylyq «Qaırat» komandasy sapynan byltyr negizgi quramda oınaǵan eki sheteldik fýtbolshy ketti.
Bul jóninde komandanyń baspasóz qyzmeti málim etti.
Aldymen grýzııalyq 28 jastaǵy jartylaı qorǵaýshy Gıorgı Zarıanyń kelisimshart merziminiń aıaqtalýyna baılanysty ketkeni habarlandy.
Gıorgı «Qaırat» sapyna 2024 jyldyń basynda qosyldy. Alǵashqy resmı matchynda ol jeńis ákelgen gol soqty. 2024 jylǵy maýsymdy joǵary deńgeıde ótkizdi. Ol 30 matchta 15 nátıjeli pas shyǵaryp, Qazaqstan Premer-lıgasynyń úzdik jartylaı qorǵaýshysy atandy.
Chempıonattyń sońǵy týrynda «Atyraýǵa» qarsy matchta jalǵyz ári sheshýshi gol soǵyp, «Qaıratqa» chempıondyq ataq alyp kelýge úlken úles qosty. 2025 jylǵy maýsymda da ol komandaǵa el chempıony atanýǵa, Qazaqstan Sýperkýbogyn jeńip alýǵa, ÝEFA Chempıondar lıgasynyń jalpy kezeńine shyǵýǵa kómektesti.
«Qaırat» quramynda Zarıa jalpy 59 match ótkizip, 16 gol soǵyp, 11 nátıjeli pas berdi.
Sondaı-aq búgin komanda quramynan ızraıldik fýtbolshy Ofrı Aradtyń ketkeni belgili boldy. «Qaırat» sapyna 2023 jyly qosylǵan ol bastapqyda ortalyq qorǵaýshy retinde oınady. Kelesi maýsymda jartylaı qorǵaýshy shebine sátti aýysyp, qysqa ýaqytta komandanyń mańyzdy oıynshylarynyń birine aınaldy.
Arad klýbqa 2024 jáne 2025 jyldary Qazaqstan chempıony atanýǵa, 2025 jylǵy Qazaqstan Sýperkýbogyn jeńip alýǵa, sondaı-aq Chempıondar lıgasynyń jalpy kezeńine shyǵýǵa kómektesti. «Qaırat» sapyndaǵy sońǵy matchynda ol «Djýzeppe Meatstsa» stadıonynda «Interdiń» qaqpasyna gol soqty (1:2).
Almatylyq klýb quramynda úsh maýsym ishinde Ofrı Arad 92 match ótkizip, 3 gol soǵyp, 10 nátıjeli pas berdi.
Eske salsaq, budan buryn Islam Chesnokov «Harts» komandasyna resmı túrde aýysty.