Qaırat Saǵadıev áıelder kúresinen QR quramasyna bas bapker bolyp taǵaıyndaldy
ASTANA. QazAqparat - Áıelder kúresinen QR ulttyq quramasynyń jattyqtyrýshylyq quramynda ózgeris boldy. Atalmysh QR quramasynyń burynǵy bas jattyqtyrýshysy Gózel Manıýrovanyń ornyna bul qyzmetke jastar quramasynyń tálimgeri Qaırat Saǵadıev keldi, dep habarlaıdy QR grek-rım, erkin kúres jáne áıelder kúresi federatsııasynyń baspasóz qyzmetinen.
Gózel Manıýrova eldiń bas komandasyn London qalasyndaǵy Olımpıadadan keıin basqardy. Esterińizge sala keteıik, G.Manıýrova Anglııa astanasynan qola júldemen oralǵan.
«Qazirgi ýaqytqa deıin ataqty sportshy jattyqtyrýshylyq qyzmetin resmı jarystarmen qatar júrgizdi. Bas jattyqtyrýshy bolyp eki jarym jyldaı ýaqyt jumys istedi. Gózel Manıýrova áıelderdiń ulttyq quramasynda jetekshi atlet bolyp tabylady jáne endi Rıo-de-Janeıro qalasynda ótetin tórtjyldyqtyń basty jarystaryna tolyq deńgeıde daıyndalýǵa barynsha nıet qoıa alady», delingen habarlamada. «Bul alqa sheshimi. Sportshy ári komandanyń bas jattyqtyrýshysy qyzmetterin birge alyp júrý, árıne, ońaı emes. Óz aldyma mynadaı maqsat qoıdym - 2016 jyly ótetin Olımpıadada tabysty shyǵý. Endi maqsatty daıyndalyp, jankúıerlerimizdiń senimin aqtaýǵa tyrysamyn. Óz tarapymnan sol úshin qoldan keletinniń bárin jasaımyn. Qaırat Saǵadıevke alǵa qoıǵan mindetterine qol jetkizýdi jáne jaqsylyqtyń barlyǵyn tileımin», - dep atap ótti Gózel Manıýrova. Ulttyq quramanyń jańa bapkeri Qaırat Saǵadıevtiń názik jandylarmen jumys jasaýda birshama tájirıbesi bar. «Ol QR jasóspirimder men jastar komandalarynyń aǵa jattyqtyrýshysy bolyp, qaramaǵynda bolǵan sportshylarmen birge jaqsy nátıjelerge qol jetkizgen: ótken jylǵy Azııa chempıonatynda bizdiń jastarymyz bes medaldi (bir altyn, bir kúmis, úsh qola) qanjyǵasyna baılap, qorytyndy beıresmı esepte ekinshi orynnan kóringen. Álem chempıonatynda Saǵadıevtiń qamqorlyǵyndaǵy sportshylar bir kúmis pen bir qola medaldi jeńip aldy», - delingen habarlamada. QR jastar quramasynyń aǵa jattyqtyrýshysy bolyp Ádilet Ermakovtyń taǵaıyndalǵanyn atap óteıik. Osyǵan deıin ol jasóspirimder quramasynda boıjetkendermen jumys istegen. Jasóspirimder komandasyn endi Murat Jumabaev basqardy. Buǵan deıin ol uzaq ýaqyt boıy OQO áıelder quramasynyń aǵa jattyqtyrýshysy qyzmetin atqaryp keldi.
