«Qaırat» – «Real» oıynyna bıleti bar 207 adam kire almaǵan

ALMATY. KAZINFORM — UEFA Chempıondar lıgasy jalpy kezeńiniń ekinshi týry aıasynda almatylyq «Qaırat» pen madrıdtik «Real» klýbtary arasyndaǵy oıynǵa bılet satyp alǵan 200-den astam jankúıer stadıonǵa kire almaı qalǵan. Osy jaǵdaıǵa baılanysty qalalyq polıtsııa tekserýdi bastady.

Bul týraly Almaty qalalyq sport basqarmasynyń basshysy Darhan Nurhanuly habarlady.

— Meniń bilýimshe, qazir tekserý júrgizilip jatyr. Tekserý sharalaryn Almaty qalalyq polıtsııa departamenti qolǵa aldy. Biz olarǵa aqparat berip, birlesip jumys istep jatyrmyz. Tekseristiń resmı nátıjesin polıtsııa keıinirek habarlaıdy, — dedi ol.

Basqarma basshysynyń aıtýynsha, keıbir bıletter júıe arqyly rastalmaǵan, sondyqtan olardyń ıesi matchqa kire almaǵan.

— Meniń bilýimshe, «Tıketon» platformasynan 207 bılet provalıdatsııadan ótpegen, ıaǵnı stadıonǵa kirýge jaramsyz bolǵan. 75 bılettiń ıesine aqshasy qaıtaryldy, qalǵany ótinish boıynsha qaıtarylady. Al alypsatarlardan satyp alynǵan bıletter úshin «Tıketon» jaýap bermeıdi jáne aqshany qaıtarmaıdy, - dedi Darhan Nurhanuly onlaın-brıfıngide.

Eske salaıyq, 30 qyrkúıekte Almatyda Chempıondar lıgasynyń ekinshi týry aıasynda «Qaırat» pen madrıdtik «Real» komandalary oınaǵan edi. Oıynnan keıin áleýmettik jelilerde matchtyń uıymdastyrylýyna qatysty pikir kóbeıdi. Ondaǵan jankúıer qolynda bıleti bola tura, stadıonǵa kire almaǵanyn aıtyp, shaǵymdanǵan.

Іshki ister mınıstriniń orynbasary Sanjar Ádilov te jaǵdaıǵa pikir bildirdi. Onyń aıtýynsha, «Qaırat» — «Real Madrıd» matchynyń bıletterin zańsyz qaıta satý faktileri boıynsha barlyq shaǵym muqııat tekseriledi jáne ár derek boıynsha qajetti sharalar qabyldanady.

Aıta ketsek, «Real» klýby Almatyda ótken UEFA Chempıondar lıgasy jalpy kezeńiniń ekinshi týry aıasyndaǵy kezdesýde «Qaıratty» 5:0 esebimen jeńdi.