«Qaırat» — «Real» matchyna bıletterdiń baǵasy jarııalandy

ALMATY. KAZINFORM — «Qaırat» fýtbol klýby UEFA Chempıondar lıgasyndaǵy Almatyda ótetin matchtaryna bılet satylymy týraly resmı habarlama jasady.

«Qaırat» — «Real Madrıd» matchyna bıletter satylymy 23 qyrkúıekte saǵat 17:00–de bastalady.

Erejege sáıkes, bir adamǵa eki bıletten artyq satyp alýǵa bolmaıdy, bılet alǵan kezde jeke kýálik nemese tólqujat derekteri kórsetilýi qajet. Derekter satyp alý kezinde de, stadıonǵa kirgende de muqııat tekseriledi.

Bıletterdi Ticketon platformasynda, FCKAIRAT.COM saıtynda jáne Qairat Superapp qosymshasynda satyp alýǵa bolady.

Árbir matchqa bılettiń baǵasy — 30 myńnan 250 myń teńgege deıin bolady.

– Bıletterdiń baǵasy ÝEFA-men kelisilgen jáne barlyq oıynǵa biryńǵaı bolyp belgilengen bılettiń baǵasy 30 000 teńgeden 250 000 teńgege deıin bolady. Baǵa saıasaty týrnır talaptaryna jáne Chempıondar lıgasy matchtaryn uıymdastyrýdyń halyqaralyq tájirıbesine sáıkes keledi, — dep habarlady «Qaırat» FK.

Sonymen qatar, abonement ıelerine óz oryndaryn aldyn ala jáne tıimdi baǵaǵa satyp alatyn múmkindik beriledi. Olarǵa satylym bastalǵanǵa deıin aldyn ala habarlasyp, tolyq aqparat beriledi.

Bıletterdiń bir bóligi dástúrli túrde bekitilgen áleýmettik jáne klýb kvotalary aıasynda bólinedi. Olar «Qaırat» Akademııasynyń jáne klýb fılıaldarynyń bapkerleri men tárbıelenýshilerine, paralımpıadalyq sport túrleriniń sportshylaryna, sondaı-aq klýbtyń qyzmetkerleri men ardagerlerine beriledi.

Aıta keteıik, Almatynyń ortalyq stadıonynda Chempıondar lıgasy matchtaryna daıyndyq jumystary qatań keste boıynsha júrgizilip jatyr. Sport ǵımarattary dırektsııasy ortalyq stadıon aldaǵy «Qaırat» — «Real Madrıd» oıynyna tolyq daıyn bolatynyn málimdedi.