Qaırat — Real matchy kezinde translıatsııa úzilip, kórermender narazylyq bildirdi: telearna ne deıdi

ALMATY. KAZINFORM — 30 qyrkúıekte ótken «Qaırat» — «Real Madrıd» matchy kezinde Qazaqstan jáne Qazsport telearnalarynyń tikeleı efıri birneshe ret qatyp qalyp, kórermender keıbir mańyzdy sátterdi, sonyń ishinde gol soǵylǵan epızodtardy kóre almady. 

Bul jaıt áleýmettik jelilerde qyzý talqyǵa tústi.

Efırdegi úzilisterge baılanysty jankúıerler telearnalardyń kásibı daıyndyǵyna kúmán keltirip, resmı túsinikteme men jaýapkershilikti talap etip jatyr.

Telearnalardyń resmı habarlamasynda translıatsııaǵa deıin tolyq tehnıkalyq daıyndyq júrgizilgeni, server qýaty ádettegiden úsh ese arttyrylǵany jáne beıne aǵynyn jetkizý qyzmeti ońtaılandyrylǵany aıtyldy.

Degenmen match bastalǵannan keıin syrtqy ınternet jelisindegi qıyndyqtar saldarynan aqaýlardy jedel sheshý múmkin bolmaǵan.

— Qazirgi tańda keshendi tehnıkalyq taldaý júrip jatyr. Týyndaǵan qolaısyzdyqtar úshin kórermenderden keshirim suraımyz, — delingen korporatsııanyń resmı málimdemesinde.

Eske salaıyq, buǵan deıin Іshki ister mınıstriniń orynbasary Sanjar Ádilov Almatydaǵy «Qaırat» — «Real Madrıd» kezdesýi qarsańynda bıletterdiń zańsyz satylýyna qatysty pikir bildirgen edi.