Qaırat — Real Madrıd: Polıglot ulandyqtar match kezinde tártipti qamtamasyz etedi
ASTANA. KAZINFORM — Búgin Almatynyń Ortalyq stadıonynda fýtboldan erekshe tartysty kezdesý ótedi, dep habarlaıdy QR ІІM Ulttyq ulanynyń baspasóz qyzmeti.
Chempıondar lıgasy aıasynda jasyl alańǵa almatylyq «Qaırat» pen álem fýtbolynyń ańyzyna aınalǵan «Real Madrıd» shyǵady. Kórermenge lyq tolatyn stadıonǵa qazaqstandyq jankúıerlermen qatar shetelden de qonaqtar keledi.
Arena ishinde de, syrtynda da tynyshtyq pen qaýipsizdikti QR ІІM Ulttyq ulanynyń 5571 áskerı bóliminiń myńnan astam áskerı qyzmetshisi qamtamasyz etedi.
Solardyń qatarynda — qatardaǵy jaýyngerler Erjan Jarkov pen Rýslan Tileýqabyl bar.
Ulttyq ulan qataryna Aqtaýdan shaqyrylǵan Erjan Jarkov qazaq, orys, aǵylshyn, ıspan jáne frantsýz tilderin erkin meńgergen. Ol kún saıyn Almaty kóshelerinde patrýlde júrip, turǵyndarǵa da, týrısterge de kómek kórsetedi.
Qonaev qalasynyń týmasy Rýslan Tileýqabyl da qazaq, orys, aǵylshyn, nemis jáne japon tilderinde erkin sóıleı alatyn — polıglot. Onyń sheteldiktermen tez til tabysý qabileti ásirese iri halyqaralyq is-sharalar kezinde asa qajet.
Qyzmet barysynda ekeýi de tártipti ári jaýapty ulandyq retinde ózin kórsete bildi. Olardyń kóp tilde sóıleı alatyndyǵy shetel azamattarynyń senimin arttyryp, qyzmettiń tıimdiligin kúsheıtedi.
— Fýtbol — álem halqyn biriktiretin qundylyq. Bizdiń mindetimiz — jankúıerlerdiń tek oıynǵa ǵana alańdap, ózderin qaýipsiz ári erkin sezinýine jaǵdaı jasaý, — dedi qatardaǵy jaýynger Rýslan Tileýqabyl.
Ulttyq ulannyń Erjan Jarkov pen Rýslan Tileýqabyl sekildi jaýyngerleri el ishinde zań men tártiptiń berik tiregine aınalyp otyr. Olar Almaty kósheleriniń tynyshtyǵyn kúzetip qana qoımaı, Qazaqstannyń qonaqjaı ári qaýipsiz el retindegi beınesin de aıshyqtaı túsýde.
Osydan buryn habarlanǵandaı, shymkenttikter tarıhı matchty úlken ekrandar arqyly kóre alady.