«Qaırat» — «Real Madrıd»: Ortalyq stadıonda daıyndyq qalaı júrip jatyr
ALMATY. KAZINFORM — Chempıondar Lıgasynyń toptyq kezeńi aıasynda «Qaırat» pen «Real Madrıd» arasyndaǵy matchqa sanaýly kúnder qaldy. Almatynyń Ortalyq stadıonynda bul mańyzdy kezdesýge qarqyndy daıyndyq júrip jatyr.
Bul oıynǵa erekshe qyzyǵýshylyq bar — 23 myńǵa jýyq jankúıerge arnalǵan alań bıletteri nebári tórt saǵattyń ishinde túgel satylyp ketti. Almatyǵa jankúıerler Qazaqstannyń túkpir-túkpirinen ǵana emes, alys-jaqyn shetelden de álemdik fýtbol juldyzdaryn óz kózimen kórý úshin keledi.
Kógal mamandar baqylaýynda
Ortalyq stadıonnyń basqarýshysy Erlan Adambekov nysan tolyq daıyn ekenin aıtty. Barlyq qyzmetter kúsheıtilgen rejımde jumys istep jatyr, al kógal táýlik boıy mamandardyń qaraýynda.
— Kógal UEFA-nyń tórtinshi kategorııasyna sáıkes keledi. Bizdiń qyzmetkerler oǵan táýlik boıy kútim jasaıdy: shóp egip, keı tusyn qııady, ár bólshegin baqylaıdy. Búgin munda UEFA ókilderi keldi, olar alańnyń jaǵdaıyna oń baǵa berdi, — dedi Erlan Adambekov.
Sondaı-aq ol jýyrda ótken Backstreet Boys tobynyń kontserti gazonǵa eshqandaı áser etpegenin aıtty.
— Biz alańdaǵan edik, biraq aýa raıyna baılanysty kógal arnaıy jylý oqshaýlaǵysh jabynmen jabyldy. Shóp qalypty jaǵdaıda qaldy. Mamandar óte jaqsy jumys istedi, qalpyna keltirý jumystaryn júrgizýdiń qajeti bolmady, — dedi ol.
Trıbýnalar men ınfraqurylym
Kórermenderge arnalǵan oryndarǵa da erekshe nazar aýdarylyp otyr. Alań basshysynyń aıtýynsha, iri sharalardan keıin keıbir oryndyqtardy aýystyrýǵa týra keledi.
— Qazir monıtorıng júrgizip jatyrmyz. Stadıondy kontsertke daıyndadyq, endi aldaǵy oıynǵa ázirlep jatyrmyz. Osy ýaqyt ishinde 1500 oryndyqty aýystyrdyq. Bul jumys jalǵasady. Menińshe, 2-3 kúnnen keıin trıbýnalar matchqa tolyq daıyn ári jankúıerlerge barynsha jaıly bolady, — dedi ol.
Qazirgi ýaqytta stadıondaǵy resmı oryndar sany — 22 800. Buryn 23 myń bolǵan, biraq telestýdııalarǵa oryn berilgennen keıin bul san azaıdy.
Aıtýynsha, stadıon — táýlik boıy jumys isteıdi. Kıim aýystyratyn bólmeler, tóreshilerge arnalǵan bólmeler jáne basqa da ınfraqurylym daıyn. Match aldynda alań boıyna UEFA mamandary jetkizetin qosymsha LED-ekrandar ornatylady.
— Sanıtarlyq toraptarǵa shaǵyn jumystar júrgizilip jatyr, olardyń tolyq iske qosylýyna az qaldy. Bul mańyzdy, óıtkeni qalaǵa kóptegen qonaqtar keledi. Óıtkeni oıynnan bólek adamdar munda jaǵdaı qalaı ekeni kórgisi keledi, atmosferany sezingisi keledi. Sondyqtan týrısterge barlyq qajetti jaǵdaıymyz bar ekenin kórsetkimiz keledi, — dedi ol.
Sonymen qatar sýretshiler stadıon qasbetterin jańartyp, oǵan jańa beıne salyp jatyr. Ortalyq stadıon shtatynda nebári 23 qyzmetker bar: 17 ákimshilik ókili jáne tehnıkalyq qyzmettiń 6 mamany.
Tarıhy bar stadıon jáne bolashaqqa kózqaras
Ortalyq stadıonnyń salynǵanyna 67 jyl toldy. Erlan Adambekov alańǵa aýqymdy jańǵyrtý jumystary qajet ekenin atap ótti. Jospar boıynsha munda zamanaýı oryndyqtar ornatylyp, trıbýnalarǵa shatyr jabylady.
Sonymen qatar ol stadıondaǵy kógaldyń ereksheligine toqtalyp ótti.
— Bizdiń kógal biregeı. Shamamen 20 santımetr tereńdikke deıin jasandy talshyqtar órilgen. Mundaı tehnologııa jasyl jelektiń kez kelgen aýa raıyna shydaýyna múmkindik beredi. Budan bólek alań jylytý jáne avtomatty sýarý júıesimen jabdyqtalǵan — shamamen 24 qurylǵy avtonomdy rejımde jumys isteıdi. Gazonnyń jaǵdaıyn táýlik boıy tájirıbesi mol, joǵary bilikti agronomdar baqylaıdy. Olar buǵan deıin 2018 jylǵy álem chempıonaty men 2012 jylǵy Eýropa chempıonaty sekildi iri týrnırlerde qyzmet etken, — dedi ol.
Alań basshysy gazondy kútip-baptaý óte qymbatqa túsetinin atap ótti. Aıtýynsha, ótken jazda aptap ystyqtan jasyl jelek zaqymdanyp, ony qalpyna keltirýge qomaqty qarajat pen kúsh jumsalǵan.
Maman jazdyń ystyǵynda munda kontsert ótkizbegen jón dep sanaıdy. Onyń sózinshe, mundaı sharalardy ótkizýdiń ońtaıly ýaqyty — mamyr nemese qyrkúıek.
Qys kezindegi oıyndar
Chempıondar lıgasy kestesine sáıkes, «Qaırat» óz alańynda 21 qazanda «Pafosty», 9 jeltoqsanda «Olımpıakosty» jáne 20 qańtarda «Brıýggeni» qabyldaıdy.
— Jeltoqsandaǵy matchta aıaz bolmaıdy dep oılaımyn. Al 20 qańtarda, ádette, qatty sýyq bolady. Eger temperatýra shamadan tys tómendep, oıynshylarǵa áser ete bastasa, UEFA jaǵdaıdy qaıta qaraıdy dep oılaımyn. Halyqaralyq reglamentke sáıkes, qatysýshylardyń densaýlyǵyna zııan tıgizýi múmkin klımattyq jaǵdaılarda match ótetin jer týraly bólek sheshim qabyldanady, — dedi ol.
«Stadıonǵa jylytqyshtar ornatý múmkin be» degen suraqqa ol bul másele ázirge qarastyrylmaǵanyn aıtty. Aıtýynsha, mundaı júıeler tek keıbir sporttyq nysandarda qarastyrylǵan, al Ortalyq stadıonǵa engizý úshin qosymsha tekseris pen kelisimder qajet.
Buǵan deıin Rafael Ýrazbahtın mańyzdy oıyn aldynda komandanyń daıyndyǵy týraly aıtty.
Sondaı-aq jaraqat alǵan «Qaırat» qaqpashylary Temirlan Anarbekov pen Aleksandr Zarýtskııdiń jaǵdaıyna toqtaldy.