«Qaırat» — «Real Madrıd»: Ortalyq stadıon mańynda jaǵdaı qalaı
ALMATY. KAZINFORM — Búgin saǵat 21:45–te ÝEFA Chempıondar lıgasynyń toptyq kezeńi aıasynda Ortalyq stadıonda «Qaırat» pen «Real Madrıd» arasyndaǵy oıyn ótedi.
Almatyda fýtbol naǵyz merekesi ornady. Ortalyq stadıonǵa qalanyń jan-jaǵynan aǵylǵan adamdardyń qarasy kóp. Olardyń kópshiligi «Qaırat» fýtbol klýbynyń jáne Qazaqstannyń týyn kóterip júr. Almatylyq komandanyń jeıdesin kıip, sharfyn taqqan adamdar da az emes.
Sondaı-aq top arasynda aq jeıdeli «Real Madrıd» jankúıerlerin de baıqaýǵa bolady. Ispanııalyq klýbty qoldaýǵa kelgen adamdar qatarynda sheteldik meımandar da, qazaqstandyqtar da bar.
Al Ortalyq stadıonnyń aınalasy naǵyz festıval alańyna aınalǵan. Munda dámhanalar, ártúrli saýda núktelerin, tipti osy matchqa bılet satyp júrgen adamdardy kezdestirýge bolady. Stadıon esigi 17:45–te ashylǵanymen, alań kireberisinde áli de uzyn-sonar kezek bar.
Eske salaıyq, «Qaırat» pen «Real Madrıd» arasyndaǵy oıyn qarsańynda Almatyǵa 5 myńnan astam sheteldik týrıst keldi.
Oıyn kezinde tártip pen qaýipsizdikti qamtamasyz etý úshin 2,5 myńnan astam polıtsııa qyzmetkeri jumyldyryldy.
Match aıaqtalǵan soń jankúıerlerdiń úılerine jaıly jetýi úshin 60 avtobýs uıymdastyrylady. Olar Abaı, Sátbaev jáne Baıtursynuly kóshelerimen qozǵalyp, 6 baǵytta qatynaıdy.
Sondaı-aq Almaty metrosynyń jumysy saǵat 01:00–ge deıin uzartyldy.