«Qaırat» — «Real Madrıd» matchynyń bıletterine qatysty jalǵan aqparat tarady

ASTANA. KAZINFORM — «Qaırat» klýby resmı málimdeme jasap, Chempıondar lıgasy matchynyń bıletteri áli satylymǵa shyqpaǵanyn aıtty.

«Qaırat» FK áleýmettik jelidegi paraqshasynda jazba jarııalap, jankúıerlerdi alaıaqtarǵa aldanbaýǵa shaqyrdy.

— Áleýmettik jelilerde taralyp jatqan «Qaırat» — «Real Madrıd» ÝEFA Chempıondar lıgasy matchynyń bıletin satý nemese aldyn ala brondaý jaıly aqparat — shyndyqqa janaspaıtyn, jańsaq habarlama. Bıletke qatysty jalǵyz resmı derekkózder — klýbtyń resmı saıty men «Qaırat» FK-nyń áleýmettik jelidegi resmı paraqshalary. Qazirgi ýaqytta bılettiń satylymǵa shyǵý kúni men baǵasy bekitilgen joq. Jankúıerlerden bógde habarlandyrýlarǵa senbeýlerin jáne bıletti beıresmı arnalar arqyly satyp almaýlaryn qatań túrde suraımyz, — delingen klýbtyń habarlamasynda.

Osydan buryn «Qaırat» – «Real Madrıd» matchynyń bıletterin qashan jáne qaıdan satyp alýǵa bolatynyn jazǵan edik.

Eske salsaq, kezdesý 30 qyrkúıek kúni Almatynyń Ortalyq stadıonynda ótedi. Match jergilikti ýaqyt boıynsha saǵat 21:45-te bastalady.