«Qaırat» – «Real Madrıd» matchynyń bıletteri 4 saǵattyń ishinde satylyp ketti

ALMATY. KAZINFORM — 30 qyrkúıekte Almatynyń Ortalyq stadıonynda ótetin Chempıondar lıgasynyń «Qaırat» pen «Real Madrıd» arasyndaǵy matchyna bılet satyp alǵysy kelgen jankúıerler dúrligip qaldy, sebebi 250 myń qoldanýshydan turatyn júıe isten shyqty, dep habarlaıdy Kazinform tilshisi.

Resmı túrde bıletterdiń 23 qyrkúıek kúni saǵat 17:00–de satylymǵa shyǵatyny jarııalanǵan bolatyn, ári tek onlaın rejımde úsh platformada ǵana satylatyny aıtyldy.

Bıletter satylymǵa shyǵarylar aldynda-aq saıtqa kirý úshin qoldanýshylar elektrondyq kezekke turýǵa májbúr boldy. Saǵat 17:00–de saıttarǵa kirýshiler sany kúrt kóbeıip ketti.

Bıletter satylymy bastalǵannan keıin bir saǵat ishinde:

• Freedom SuperApp qosymshasyndaǵy kezek — 200 myńnan astam,
• Ticketon platformasynda — 100 myńnan astam,
• Qairat SuperApp arqyly — 27 myńnan astam qoldanýshy tirkeldi.

Jalpy kezekte turǵandar sany 300 myńnan asyp tústi.

Aıta ketý kerek, Ortalyq stadıonnyń syıymdylyǵy — 23 804 oryn. Biraq buryn jarııalanǵandaı, bıletterdiń bir bóligi klýb qyzmetkerlerine, paralımpıadashylarǵa, akademııa tárbıelenýshilerine jáne ÝEFA ókilderine rezervtelgen. Sondyqtan satylymǵa tek 20 myńnan sál asatyn bılet qana shyǵarylǵan.

Áleýmettik jelilerde qoldanýshylar qoldanbalar men saıttardyń jıi turyp qalǵanyn, kezek kelgen kezde de júıeniń jumys istemeı qalǵanyn, keı jaǵdaıda júıeniń olardy kezek sońyna qaıta laqtyryp jibergenin jazyp, shaǵymdandy.

Saǵat 21:30–da barlyq platformalarda «Qaırat — Real Madrıd» matchynyń bıletteri tolyq satylyp ketkeni týraly habarlama shyqty. Joǵary suranysqa baılanysty barlyq jankúıerlerdiń bılet satyp alýǵa múmkindigi bolmady.

Eske sala keteıik, bılet baǵalary 30 000 teńgeden 250 000 teńgege deıin ózgergen, bul baǵa orynnyń sektoryna baılanysty anyqtalǵan.