«Qaırat» – «Real Madrıd» matchy: bıletterdi qashan jáne qaıdan satyp alýǵa bolady

ASTANA. KAZINFORM – Almatynyń «Qaırat» klýby 30 qyrkúıekte Chempıondar lıgasynyń toptyq kezeńinde madrıdtik «Realdy» qabyldaıdy.

Tarıhı kezdesý Almatynyń Ortalyq stadıonynda ótedi. Oıyn astanalyq ýaqytpen 21:45-te bastalady.

24 myń jankúıerge arnalǵan arenanyń trıbýnalary lyq tolady dep kútilýde. Bul matchqa Qazaqstanmen qatar kórshiles elderdiń jankúıerleri de zor qyzyǵýshylyq tanytyp otyr.

Bıletterdi qaıdan alýǵa bolady?

Aldyńǵy matchtarǵa bıletter klýbtyń resmı arnalarynda satylǵan bolatyn: Qairat SuperApp qosymshasy, klýbtyń resmı saıty (bıletter bólimi), Freedom SuperApp (bıletter bólimi) jáne Ticketon platformasy. Bir qolǵa bes bıletten artyq berilmegen. Klýb baspasóz qyzmeti jankúıerlerge satyp alý protsesin jeńildetý úshin aldyn ala tirkelýdi usynady.

Alaıda suranystyń joǵary bolýyna baılanysty bıletter tez ótip ketedi. Buǵan deıingi oıyndarǵa bıletter eki saǵat ishinde satylyp bitken edi.

Keıin áleýmettik jelilerde olardy qaıta satýshylar 50-80 myń teńgege deıingi baǵamen usynǵan.

Osyǵan oraı qazaqstandyq jankúıerler GosRating.com saıtynda petıtsııa jarııalap, bir adamǵa eki bıletten artyq satpaý jáne JSN arqyly tekseris engizý týraly usynys bildirdi.

Qashan satylady?

Resmı satý kúni ázirge jarııalanǵan joq. Ádette bıletter matchqa 1-2 apta qalǵanda satylymǵa shyǵady. Degenmen, bul joly satylym úsh apta buryn da bastalýy múmkin.

Aqparat klýbtyń resmı arnalarynda jarııalanady. Jankúıerlerge push-habarlamalarǵa senip qalmaı, resmı arnalardy ózderi baqylap otyrý usynylady.

Baǵasy qansha?

Іrikteý kezeńinde bıletter 1500 teńgeden bastalǵan bolatyn.

Alaıda toptyq kezeńde, ásirese «Realǵa» qarsy matchqa baǵa edáýir qymbat bolýy yqtımal. Bul – kezdesýdiń mártebesine jáne oǵan degen joǵary suranysqa baılanysty.

Qalaı satyp alynady?

Satylym bastalǵan sátte vırtýaldy kezek qurylady. Ol kezdeısoq tártippen júredi. Bos oryndar sanaýly mınýt ishinde ótip ketetindikten, jankúıerlerge jyldam áreket etý qajet.

Tólem onlaın jasalady, bıletter elektrondy túrde beriledi.

Eske sala keteıik, «Qaırat» alǵash ret óz tarıhynda Chempıondar lıgasynyń toptyq kezeńine shyqty.

Almaty klýby irikteý kezeńinde Slovenııanyń «Olımpııasyn», Fınlıandııanyń «KýPS» klýbyn, Slovakııanyń «Slovanyn» jáne Shotlandııanyń «Seltıgin» tize búktirdi.