Qaırat — Real Madrıd matchy: Almatynyń ortalyq stadıony retke keltirilip jatyr

ASTANA. KAZINFORM — Almatynyń ortalyq stadıonynda Chempıondar lıgasy matchtaryna daıyndyq jumystary qatań keste boıynsha júrgizilip jatyr. Bul týraly Sport ǵımarattary dırektsııasy habarlady. 

Almatynyń ortalyq stadıony ÝEFA-nyń tórtinshi sanatyna ıe. Bul deńgeı Chempıondar lıgasy men ózge de eýrokýbokterdiń jartylaı fınalyna deıingi oıyndaryn ótkizýge múmkindik beredi. Fýtbol alańy, jaryqtandyrý júıesi, kıim aýystyratyn bólmeler, komandalar men tóreshilerge arnalǵan aımaqtar barlyq talapqa tolyq sáıkes keledi. Sondaı-aq halyqaralyq matchtardy ótkizýge quqyq beretin sertıfıkattar da bar.

Degenmen nysanda áli de jóndeý men jańartý jumystaryn júrgizý kerek.

Dırektsııa ókilderi stadıondaǵy basty olqylyqtar retinde synyp qalǵan oryndyqtar men eski dárethanalardy atady.

— Stadıon eskileý, al kórermenderdiń bir bóligi nysan múlkine uqypsyz qaraıdy, — delingen habarlamada.

Dırektsııa ortalyq stadıon aldaǵy «Qaırat» — «Real Madrıd» oıynyna tolyq daıyn bolatynyn málimdedi. Atap aıtqanda, qajetti jóndeýler jasalyp, tazalyq pen qaýipsizdikti saqtaý sharalary kúsheıtiledi, halyqaralyq deńgeıdegi oıyndardy ótkizýge qoıylatyn barlyq talap oryndalady.

— Ádette matchtardan keıin oryndyqtardyń bir bóligi zaqymdalady, sondyqtan olar únemi tekserilip, aýystyrylyp otyrady. Qazir bul másele qatań baqylaýda: kreslolardy aýystyrý jáne qalpyna keltirý jumystary júrgizilip jatyr, aýmaq abattandyryldy. Buǵan deıin sanıtarlyq-gıgıenalyq toraptarǵa (dárethanalarǵa — avt.) jeńil jóndeý jasalsa, qazir keshendi jóndeý bastaldy, — dep atap ótti Sporttyq nysandar dırektsııasy.

Eske salaıyq, buǵan deıin Almaty polıtsııasy qala turǵyndary men qonaqtaryna aldaǵy ótetin Qaırat — Real Madrıd fýtbol matchyna bılet satyp alý kezinde saq bolýdy eskertken edi.