«Qaırat» - «Real Madrıd»: Almatyda stadıonnan tegin avtobýstar júredi

ALMATY. KAZINFORM – ÝEFA Chempıondar lıgasynyń toptyq kezeńi aıasynda 30 qyrkúıek kúni Ortalyq stadıonda «Qaırat» pen «Real Madrıd» arasyndaǵy oıyn ótedi.

Almaty ákimdiginiń málimetinshe, Ortalyq stadıon ıspanııalyq komandany qabyldaýǵa daıyn: alań halyqaralyq standarttarǵa saı, jaryq berý júıesi men ınfraqurylym tekserildi. Tóreshiler men oıynshylarǵa barlyq jaǵdaı jasalǵan, kıim aýystyratyn bólmeler jabdyqtalyp, sportshylardyń jaılylyǵy úshin qajettiliktermen qamtamasyz etilgen.

- Stadıonnyń ishki bezendirilýine erekshe kóńil bólindi: trıbýnalar jańartyldy, stadıon sáýletine saı jańa kórkem sýretter jasaldy. Kórermenderge yńǵaıly bolý úshin 1,5 myńnan astam oryndyq aýystyryldy, sanıtarlyq toraptar jańartylyp, qosymsha 60 bıodárethana ornatyldy, - dep habarlady ákimdikten.

Odan bólek baqylaý-ótkizý beketterine metall detektorlar men qol skanerleri qoıyldy. Stadıon aýmaǵynda jedel járdem kólikteri men órt sóndirý brıgadalary kezekshilik etedi, evakýatsııa josparlary men dabyl berý júıesi tekserildi.

Match aıaqtalǵan soń jankúıerlerdiń úılerine jaıly jetýi úshin 60 avtobýs uıymdastyrylady. Olar Abaı, Sátbaev jáne Baıtursynuly kóshelerimen qozǵalyp, 6 baǵytta qatynaıdy:

* Ortalyq stadıon – «Almaty Arena» – batys baǵyty;

* Ortalyq stadıon – Raıymbek/Alataý – batys baǵyty;

* Ortalyq stadıon – Almaty-1 temirjol vokzaly;

* Ortalyq stadıon – «Orbıta» shaǵyn aýdany;

* Ortalyq stadıon – «Juldyz» shaǵyn aýdany – shyǵys baǵyty;

* Ortalyq stadıon – Áýejaı – shyǵys baǵyty.

Eske salaıyq, oıyn kezinde tártip pen qaýipsizdikti qamtamasyz etý úshin 2,5 myńnan astam polıtsııa qyzmetkeri jumyldyrylady.

Buǵan deıin «Real Madrıd» fýtbol klýbynyń bas bapkeri Habı Alonso «Qaıratqa» qarsy ótetin oıynǵa qatysty pikir bildirdi.