Qaırat Perızat kolonııada jumysqa ornalastyrylady

ASTANA. KAZINFORM — Sottalýshy Perızat Qaırattyń jumysqa ornalasý máselesi bos jumys ornynyń bolýyna jáne onyń kásibı daǵdysyna baılanysty sheshiledi. Bul týraly Іshki ister mınıstriniń orynbasary — Qylmystyq-atqarý júıesi komıtetiniń tóraǵasy Abaı Qaıyrbekov aıtty. 

— Onyń qabiletin tekserip, mekemedegi bos jumys ornynyń bolýyn qaraımyz. Eger ol sol talaptarǵa saı kelse, onda sottalýshyny jumysqa ornalastyra alamyz, — dedi mınıstr orynbasary.

Onyń aıtýynsha, Perızat Qaırat belgilengen karantınnen ótedi.

— Mekemege kelgennen keıin onyń qabiletin zerdeleımiz. Qaı bólimde bos jumys orny bolsa, sony usyna alamyz. Tigin óndirisimen aınalysa alady nemese mekeme ishindegi sharýashylyq bólimde basqa da jumys isteýge múmkindigi bar, — dep túsindirdi Abaı Qaıyrbekov.

Mınıstr orynbasarynyń atap ótýinshe, sottalýshylardyń jalaqy mólsheri atqarǵan jumys kólemine baılanysty bolady.

— Sottalýshy eń tómengi jalaqy alatyny anyq, — dedi mınıstr orynbasary.

Eske salsaq, shilde aıynda Elorda soty «Biz birgemiz» qaıyrymdylyq qorynyń burynǵy jetekshisi Perızat Qaırat pen onyń anasy Ǵaını Alashbaevaǵa úkim shyǵarǵan edi. Sot úkiminde Perızat Qaıratty 10 jylǵa, anasyn 7 jylǵa bas bostandyǵynan aıyrý jazasy taǵaıyndalǵan.

Al tamyz aıynda advokat Perızat Qaırat pen onyń anasyn aqtaýdy talap etip, sotqa shaǵym túsirdi. 

Qyrkúıekte sottalǵandardyń advokatynyń apellıatsııalyq shaǵymdary qanaǵattandyrýsyz qalǵany belgili boldy.