"Qaırat» pen «Jetisý» fýtbol klýbtary arasyndaǵy joldastyq kezdesý 1:1 esebimen aıaqtaldy
ALMATY. 24 naýryz. QazAqparat - Ulystyń uly merekesine oraı keshe Almatydaǵy Ortalyq stadıonda fýtboldan "Qaırat" pen "Jetisý" fýtbol klýbtary arasynda joldastyq kezdesý ótti.
Oıynnyń birinshi jartysynda taldyqorǵandyqtardan ózbek legıoneri Shavkat Salomov 11 mınýtta Ildar Shaıhyslamovty qapy qaldyryp, birinshi bop esep ashyp, óz komandasyn alǵa shyǵarǵan bolatyn. Ekinshi taımnyń alǵashqy shıreginde (61-shi mınýt) almatylyqtardan Tımýr Baıjanov esepti teńestirip, jankúıerlerdi bir jelpintken edi. Alaıda budan keıin qos komanda da tablodaǵy esepke ózgeris engize almady.
Vdadımır Vaıss jattyqtyratyn almatylyqtar buǵan deıin Premer-lıgadaǵy el chempıonatynyń birinshi týrynda Omarı Tetradze baptaıtyn taldyqorǵandyqtarmen óz alańynda 3:3 esebimen teń túsken bolatyn. Onda Sh.Salomov "Qaırat" qaqpasyna 49-shy mınýtta penaltıden dop soqqan edi.
