«Qaırat» pen «Zenıt» oıynynyń taǵdyryn jalǵyz gol sheshti

Bul oıynnyń tarıhı mańyzy zor. Qos komanda 1991 jyldan beri alǵash ret kezdesip otyr. Aıta keterligi, ekeýi sońǵy márte 27 jyl buryn Keńes odaǵy birinshiliginde birinshi topta sheberlik baıqasqan eken. Sodan beri bir-birimen jolyǵyp kórmegen. Endeshe, búgingi kezdesýde eki komanda da ózderin jaqsy qyrynan tanytýǵa tyrysqany anyq.

Odan beri qanshama ýaqyt ótti. Kezinde Reseıdiń ortanqol klýby qatarynda bolǵan «Zenıt» búginde tek óz elinde emes Eýropa qurlyǵynda da mańdaıaldy ujymdar qataryna qosyldy.

Bıyl Reseı elinde ótken álem birinshiligi fınaldyq kezeńindegi birqatar oıyndar ótkizilgen «Sankt-Peterbýrg» stadıonyna jınalǵan 40 myńǵa jýyq jankúıer aldynda qos komanda jaqsy oıyn órnegin kórsetti. Atalmysh kezdesýde «Qaırattyń» kapıtandyq mindetin Andreı Arshavın atqardy. Aıta keterligi, ol kezinde «Zenıt» sapynda jarqyldap kózge tústi. Aǵylshyn elindegi «Arsenal» klýbynda da ózin jaqsy qyrynan tanyta bildi.

Búgingi kezdesý taǵdyryn jalǵyz gol sheshti. Ol 32 mınýtta soǵyldy. «Zenıttiń» argentınalyq shabýylshysy Sebastıan Drıýssı qaqpa mańdaıshasynan keıin serpilgen dopty golǵa aınaldyrdy. Qos komanda sońǵy oıyndaryn 1991 jyldyń 27 qazanynda Almaty qalasynda ótkizgen. Bul oıynda almatylyqtar 1:0 esebimen jeńiske jetken edi. Bylaısha aıtqanda, «Zenıt» sol jeńilistiń qarymtasyn qaıtardy.

Qos komanda da búgingi kezdesýge ózderiniń myqty quramyn qosa alǵan joq. Búginde Eýropa qurlyǵynda Ulttar lıgasy oıyndary júrip jatyr. Qazaqstan D lıgasynda synǵa tússe, Reseı V lıgasynda baq synap keledi. «Qaırat» ta, «Zenıt» te sol oıyndarǵa ózderiniń úzdikterin úkilep qosty. Sondyqtan olar búgingi oıynǵa qatysa alǵan joq.

«Qaırat» endi el birinshiligindegi kezekti oıynyn 16 qyrkúıekte ótkizedi. Dál osy kúni óz alańynda Oraldyń «Aqjaıyq» komandasyn qabyldaıdy. Qazir «Qaırat» týrnır kestesinde ekinshi orynda tur. Basty qarsylasy - «Astana» komandasynan nebári úsh upaı artta qalyp keledi.