«Qaırat» pen «Tobyl» Eýropa Lıgasyndaǵy jeńisin Denıs Tenge arnady
ASTANA. QazAqparat - Almatylyq «Qaırat» pen qostanaılyq «Tobyl» komandalary qazaqstandyq mánerlep syrǵanaýshy Denıs Tenniń otbasyna kóńil aıtty. Sondaı-aq olar ózderiniń Eýropa Lıgasyndaǵy jeńisterin Denıske arnaıtyndyqtaryn jetkizdi, dep habarlaıdy Sports.kz.
«Búgin kókiregimiz orny tolmas ókinishke toldy. Sochıde ótken Olımpıada oıyndarynyń qola júldegeri, mánerlep syrǵanaýshy Denıs Ten 25 jasynda qaza boldy. «Qaırat» fýtbol klýbynyń músheleri Denıstiń otbasy men týystarynyń qaıǵysyna ortaqtasyp, kóńil aıtady jáne búgingi jeńisin Denıstiń qurmetine arnaıdy. Ol óziniń tabandylyǵy men eńbekqorlyǵynyń arqasynda Qazaqstandy álemge tanytty», - delingen «Qaırat» komandasynyń Instagram paraqshasynda.
«Ómirden óz isiniń has sheberi ozdy. «Tobyl» komandasy Denıs Tenniń qaıǵyly qazaǵa ushyraýyna baılanysty qazaqstandyqtardyń qaıǵysyna ortaq. Denıs Ten memleketter dostastyǵynyń sımvoly ispettes edi, ol daryndy sportshy, Qazaqstannyń maqtanyshy bolatyn. Qaıǵyly jaǵdaı bárimizdiń de qabyrǵamyzdy qaıystyrdy. Biz jeńisimizdi Denıs Tenniń qurmetine arnaımyz»,-delingen «Tobyl» komandasynyń habarlamasynda.
Aıta keteıik, 19 shilde kúni Almatyda eldegi eń daryndy, sportsúıer qaýymǵa keńinen tanys, tanymal sportshylardyń biri Denıs Ten jambasynan pyshaqtan jaraqat aldy. Dárigerler qanshama arpalysqanymen onyń ómirin aman alyp qala almady.
Denıs Tenniń qazasy búkil Qazaqstandi dúrliktirgen qaıǵyly oqıǵa boldy. Elbasy tanymal sportshynyń otbasyna kóńil aıtty. Qazsport telearnasy osy oqıǵaǵa baılanysty habar baratý kestesin ózgertti. ISU prezıdenti ıAn Daıkema Denıstiń qazasyn jantúrshigerlik oqıǵa dep baǵalady.
