«Qaırat» pen «Gomel» arasyndaǵy kezdesý 0:1 esebimen aıaqtaldy
ALMATY. 7 aqpan. QazAqparat /Erlik Erjanuly/ - Keshe Túrkııada kezekti oqý-jattyǵý jıynyn ótkizip jatqan «Qaırat» fýtbol klýby «Gomel» komandasymen joldastyq kezdesý ótkizdi.
Onda Dmıtrıı Ogaı jattyqtyratyn almatylyqtar byltyrǵy maýsymdaǵy Belarýs chempıonatynyń qola júldegerinen 0:1 esebimen jeńilip qaldy. Oleg Kýbarev tizginin ustaǵan gomeldikter 2003 jyly Belarýsııa chempıony, 1999 jáne 2011 jyldary qola júldeger, al 2001/2002, 2010/2011 jylǵy maýsymda Belarýs kýbogynyń ıegeri atanǵan bolatyn.
«Qaırat» ótken maýsymda Premer-lıgadan Birinshi lıgaǵa túsip qalyp, Qazaqstan fýtbol federatsııasy Atqarý komıtetiniń sheshimmen ǵana qaıta oralǵan edi. Olardyń kelesi joldastyq kezdesýi 9 aqpanda ótedi. Almatylyqtardyń bul jolǵy qarsylasy Serbııanyń Birinshi lıgasynda óner kórsetetin Belgrad qalasynyń «Teleoptık» komandasy bolmaq.
