«Qaırat» pen «Aberdın» arasyndaǵy qarymta matchy «Kazsport» telearnasynyń efırinen kórsetilmeıdi
ASTANA. QazAqparat - «Qaırat» fýtbol klýbynyń shotlandtyq «Aberdın» fýtbolshylaryna qarsy qarymta matchy «Kazsport» telearnasynyń efırinen kórsetilmeıtin boldy.
Eýropa Lıgasynyń úshinshi biliktilik raýndynyń «Qaırat» pen «Aberdın» quramalarynyń ekinshi kezdesýi 6 tamyz kúni Aberdın qalasynda (Shotlandııa) ótedi. Alaıda shotlandııalyq televızııa ókilderi bul oıynnyń túsirilimin ótkizbeıdi, bul týraly «Kazsport» telearnasynyń ókilderine joldaǵan resmı hattan belgili boldy.
«Osy maýsymda bizdiń quramalarymyzdyń eýropakýboktaryndaǵy matchtaryn osymen birneshe ret kórsete almaı otyrmyz, olardy kórsetý úshin bar kúshimizdi salyp otyrmyz», - dep, oıymen bólisti «Kazsport» telearnasynyń bas prodıýseri Pavel Tsybýlın, - mysaly, «Astana» jáne «Marıbor» fýtbol quramalarynyń arasyndaǵy qonaqta kezdesýiniń birinshi oıyny televızııalyq kórsetilimin kórermenderimizge usyna almadyq. Slovenııanyń telearnalary Marıborda ótken matchty túsirýden de, kórsetýden de bas tartty, sebepterin de túsindirmedi. Biz sońǵy ýaqytqa deıin sol matchty kórsetý úshin bar kúshimizdi saldyq, alaıda qolymyzdan kelmedi, «Aberdın» men «Qaırat» arasyndaǵy matchty da kórsetýge múmkindik bolmaı tur».
Esterińizge sala keteıik, shotlandtyq jáne qazaqstandyq quramalar arasyndaǵy birinshi kezdesý 30 shilde kúni Almaty qalasynyń Ortalyq stadıonynda ótti. Ol 2:1 esebimen Qaırattyń jeńisimen aıaqtaldy. «Kazsport» telearnasy bul matchty tikeleı efırden kórsetken bolatyn.
