«Qaırat» – «Pafos» matchynyń bıleti satylymǵa shyqty

ALMATY. KAZINFORM – «Qaırat» fýtbol klýby Chempıondar lıgasyndaǵy ónerin jalǵastyryp jatyr.

Almatylyq klýb buǵan deıin syrt alańda portýgalııalyq «Sportıngpen» jáne óz alańynda ıspanııalyq «Real Madrıdpen» oınady. «Qaırat» endi Kıprdiń «Pafos» komandasymen kezdesedi.

«Qaırat» – «Pafos» matchy 21 qazanda Ortalyq stadıonda saǵat 21:45-te ótedi. Bıletter búgin, 13 qazanda saǵat 12:30-dan bastap satylymǵa shyqty.

Bıletti Freedom SuperApp jáne Kairat SuperApp qosymshalary arqyly satyp alýǵa bolady jáne erejeleri «Qaırat» pen «Real Madrıd» oıyny kezindegideı.

Qazir «Qaırattyń» Chempıondar lıgasynyń negizgi kezeńinde eki oıynnan keıin qorjynynda upaıy joq. «Pafospen» kezdesýden keıin almatylyqtar taǵy bes oıyn ótkizedi.

Eske salaıyq, munyń aldynda almatylyq «Qaırat» pen madrıdtik «Real» klýbtary arasyndaǵy oıynǵa bılet satyp alǵan 207 jankúıer kire almaı qalǵanyn jazǵanbyz. Osy jaǵdaıǵa baılanysty qalalyq polıtsııa tekserýdi bastady.