«Qaırat» — «Pafos»: bıletter 30-250 myń teńge aralyǵynda satylyp jatyr
ALMATY. KAZINFORM — Almatynyń Ortalyq stadıonynda erteń «Qaırat» pen «Pafos» komandalary arasynda match ótedi.
ÝEFA Chempıondar lıgasynyń aıasynda ótetin oıynǵa bıletter bir apta buryn satylymǵa shyqsa da, jartysynan azy satyldy. Іrikteý kezeńindegi «Seltık» pen toptyq kezeńdegi «Real Madrıdke» qarsy oıynda bıletter sanaýly saǵattarda satylǵan edi.
«Real Madrıd» komandasymen oıynda bıletterdiń baǵasy 250 myńnan 30 myńǵa deıin boldy. «Pafosqa» qarsy match aldynda da bıletter baǵasy osy aralyqta qalǵan. Tek 30 myńdyq jáne 75 myńdyq sektor men oryndar sany kóbeıgen. Biraq mundaı baǵa otandyq jankúıerler arasynda narazylyq týdyrdy. Áleýmettik jelide adamdar Kıpr komandasy keletin oıyn úshin bılet tym qymbat ekenin jazyp jatyr. Tipti, almatylyq klýbtyń bul áreketine narazylyq bildirý úshin atalǵan oıynǵa baıkot jarııalaýdy usynǵandar da boldy.
Qazir Ortalyq stadıonnyń 11, 52, 42 jáne qonaq komandanyń jankúıerlerine arnalǵan sektorlarda bılet joq.
Qalǵan sektorlardyń eshqaısysynda bıletter tolyq satylmaǵan. Tek ár tustan 30 myńdyq oryndar, birshama 75 myńdyq oryndar jáne sanaýly 150-250 myńdyq oryndar búginge deıin ótken.
Búgin match aldyndaǵy baspasóz máslıhatynda «Qaırat» oıynshysy Erkin Tapalov «bıletterdiń satylmaýyna baılanysty bos trıbýnalar oıynshylarǵa qalaı áser etedi» degen suraqqa jaýap berdi.
— Bul bizdiń oıynymyzǵa esh áser etpeıdi. Biz qoldaý qandaı bolsa da, jeńýge tyrysamyz. Chempıondar lıgasynda jeńiske jetip, tarıh jasaǵymyz keledi. Barymyzdy salamyz. Bizdi qoldaıtyn naǵyz jankúıerler keledi dep úmittenemiz, — dedi ol.
Eske salaıyq, Qaırat» fýtbol klýbynyń bas bapkeri Rafael Ýrazbahtın komandanyń daıyndyǵy týraly aıtty.