«Qaırat» óz erkimen klýbtan ketken oıynshyǵa qatysty pikir bildirdi
ASTANA. QazAqparat - «Qaırat» FK Akmal Bahtııarovtyń komandadan óz erkimen ketýine qatysty pikir bildirdi, dep habarlaıdy «SPORTINFORM» SAA klýbtyń resmı saıtyna silteme jasap.
«Osy jyly maýsym aıynyń sońynda «Qaırat A» komandasynyń oıynshysy Akmal Bahtııarov klýbpen kelisimde bola otyryp, belgisiz agenttiń úgitteýimen klýbtan óz erkimen ketti. Mundaı áreketterdiń oıynshynyń mansabyna keri áser etetinin, tipti onyń mansabyn aıaqtaýy múmkin ekenin túsine otyryp, «Qaırat» FK ony qaıtarý úshin barlyq múmkindikterdi jasady. Oǵan qosa, Akmaldi oıynan aınıdy dep úmittenip, oqıǵa týraly barlyq aqparattardy joqqa shyǵardy. Alaıda, agenttiń ýádesi oǵan mańyzdy boldy.
Klýb óziniń zańdy quqyqtaryn qorǵaý maqsatynda daýdy sheshý úshin Palataǵa júginýge májbúr boldy. 24 shildede Palata oıynshyny sporttan shettetý týraly sheshim shyǵaryp, oǵan aıyppul saldy.
«Qaırat» FK tárbıelenýshige qatysty bolǵan jaǵdaıǵa ókinedi, alaıda aldaǵy ýaqytta da óz quqyqtary men múddelerin qorǵaý úshin zańnamamen qarastyrylǵan barlyq sharalardy qoldanýdy jalǵastyrady», - delingen habarlamada.
