«Qaırat» oıynshysy jyldyń úzdik qaqpashysy atanýy múmkin
ASTANA. QazAqparat - «Qaırat» fýtzal klýbynyń oıynshysy Igıta «Álemniń úzdik qaqpashysy» atanýy múmkin, dep habarlaıdy «QazAqparat» HAA komandanyń baspasóz qyzmetine silteme jasap.
Ol atalǵan sanat boıynsha UMBRO Futsal Awards 2017 syılyǵyna úmitker 10 fýtzalshynyń qataryna kirdi, Úmitkerlerdiń tolyq tizimi tómendegishe:
Mıodrag Aksentevıch (Serbııa, «Tıýmen»)
Gýıtta (Brazılııa, «Korıntıans»)
Katavıýt Hankampa (Taıland, «Chonbýrrı»)
Igıta (Qazaqstan, «Qaırat»)
Hesýs Errero (Ispanııa, «Inter»)
Mohammadı Kamalabadı (Iran, «Pasand Isfahan»)
Pako Sedano (Ispanııa, «Barselona»)
Álıreza Samımı (Iran, «Mes Sýngýn»)
Tıago (Brazılııa, «Magnýs»)
Vıllıan (Brazılııa, «Krona»)
Eske sala ketsek, Igıta osy atalymdy buǵan deıin qatarynan eki márte (2015, 2016 jyldary) jeńip alǵan bolatyn. Álemniń eki dúrkin úzdik qaqpashysy atanǵan oıynshylar sanaýly ǵana. Igıtaǵa deıin osy bıikke aty ańyzǵa aınalǵan ıspanııalyq Lýıs Amado (2003, 2004 j.) men ıtalııalyq Stefano Mammarelý (2011, 2012 j.) ǵana kóterilgen.
Jeńimpaz esimi 2018 jylǵy 10 qańtarda belgili bolady.
