«Qaırat» – «Olımpıakos»: matchqa arnaıy shattl avtobýstar qatynaıdy

ASTANA. KAZINFORM – Kórermender úshin stadıonǵa arnaıy avtobýstar qatynaıdy. 

Elordanyń «Astana Arena» stadıonynda 9 jeltoqsan kúni Chempıondar lıgasynyń aıasynda «Qaırat» – «Olımpıakos» matchy ótedi.

Qala ákimdigi match kúni stadıonǵa qatynaıtyn shamamen 25 avtobýs uıymdastyrady.

Avtobýstar myna oryndardan qatynaıdy:

1.«Qalalyq tsırk» avtoturaǵy; 2. «Áziret Sultan» meshitiniń avtoturaǵy; 3. «Qazaqstan» sport kesheniniń avtoturaǵy; 4. Ortalyq park avtoturaǵy; 5. «Bas Meshit» avtoturaǵy.

Avtobýstar 18:00-de qozǵala bastaıdy jáne eki baǵytta qatynaıdy. Kórermenderge jınalý oryndaryna 17:30-ǵa deıin kelý usynylady.

Match kezinde Astana qalasynyń polıtsııa departamenti qaýipsizdik sharalaryn kúsheıtedi. Qoǵamdyq tártipti qamtamasyz etý úshin shamamen 2800 polıtsııa qyzmetkeri jumyldyrylady, oǵan patrýldik bólimsheler, ýchaskelik ınspektorlar jáne kınologııalyq qyzmet kiredi.

Qabanbaı batyr men Turan dańǵyldarynda kólik qozǵalysyna shekteýler engizilmeıdi.

Astana polıtsııasy kórermenderge qoǵamdyq tártipti saqtaýdy, quqyq qorǵaý qyzmetkerleriniń nusqaýlyqtaryn oryndaýdy eskertedi jáne matchqa qaýipsiz ári yńǵaıly jetý úshin uıymdastyrylǵan qoǵamdyq kólikti paıdalanýdy usynady.

Aıta ketelik «Olımpıakos» komandasynyń oıynshylary Astanaǵa kelgen edi.