«Qaırat» — «Olımpıakos»: Astana arenadaǵy match bıletteri qalaı satylyp jatyr
ALMATY. KAZINFORM — Chempıondar lıgasy aıasynda «Qaırat» pen «Olımpıakos» arasyndaǵy oıyn «Astana arena» stadıonynda 9 jeltoqsan kúni saǵat 20:30–da ótedi.
Match bıletteri 28 qarasha kúni satylymǵa shyqty. Bir adam JSN arqyly eki bıletten artyq ala almaıdy. Bılet baǵasy — 15 000 — 50 000 teńge aralyǵynda. Atap aıtqanda:
• 4 sanattaǵy S jáne N trıbýnalary (ońtústik jáne soltústik) — 15 myń teńge;
• 3 sanattaǵy ústińgi W jáne E trıbýnalary (batys jáne shyǵys) — 25 myń teńge;
• 2 sanattaǵy tómengi W jáne E trıbýnalary (batys jáne shyǵys) — 35 myń teńge;
• 1 sanattaǵy ortańǵy W3 — W7 trıbýnalary (batys) — 50 myń teńge.
Bir aptaǵa jýyq ýaqyt ótse de, bıletterge joǵary suranys joq. Qazir 50 myńdyq oryndar jáne batys trıbýnanyń tómengi 3 sektorynda (W4-W6), sondaı-aq S2 sektorynda oryn joq. Al 15 myńdyq ońtústik jáne soltústik trıbýnanyń sektorlarynda birshama bılet satylǵan. Qalǵan oryndarda bılet jeterlik.
Almatylyq komandaǵa arnalǵan áleýmettik jelidegi paraqshalarda adamdar bıletterdiń baıaý satylýyna baılanysty ártúrli pikir bildirgen. Biri «Qaırat» almatylyq klýb, jankúıerleriniń bári Almatyda» dese, ekinshisi «Dastan bolmaıdy, sondyqtan shyǵar» dep jazǵan. Odan bólek «qatty sýyq emes, Almatyda ótkizýge bolar edi» dep pikir qaldyrǵan.
Eske salaıyq, buǵan deıin «Qaırat» fýtbol klýby ÝEFA-men birlese otyryp, Chempıondar lıgasynyń jalpy kezeńinde «Olımpıakos» (9 jeltoqsan), «Brıýgge» (20 qańtar) komandalaryna qarsy óz alańyndaǵy matchtaryn «Astana Arena» stadıonyna kóshiretinin habarlaǵan edi.
Oǵan deıin «Qaırattyń» «Real Madrıd» jáne «Pafos» komandalaryna qarsy oıyndary Almatynyń Ortalyq stadıonynda ótti. Bul matchtarǵa bılet 30-250 myń teńge aralyǵynda satyldy.