Qaırat Nurtastyń kontserti: Astanada arnaıy shattldar qatynaıdy
ASTANA. KAZINFORM — «Astana Arena» stadıonynda 27 qyrkúıek kúni saǵat 19:00–de tanymal ánshi Qaırat Nurtastyń kontserti ótedi. Kórermenge qolaıly jaǵdaı jasaý jáne kólik keptelisin azaıtý úshin bul kúni arnaıy shattl-marshrýttar qatynaıdy. Bul týraly elorda ákimdigi málim etti.
Arnaıy avtobýstar saǵat 16:00–den bastap júredi.
Olar jolaýshylardy qalanyń tórt jerinen «Astana Arena» stadıonyna jetkizip, kontsert aıaqtalǵannan keıin keri baǵytta da tasymaldaıdy.
Arnaıy kólikterdiń júrý baǵyttary:
— Astana tsırkiniń avtoturaǵy;
— «Áziret Sultan» meshitiniń avtoturaǵy;
— Qajymuqan kóshesindegi «Qazaqstan» sport kesheniniń avtoturaǵy;
— «Nur-Sultan» meshitiniń (Bas meshit) avtoturaǵy. Shattl-avtobýstar eki baǵytta da — kontsert bastalǵanǵa deıin jáne is-shara aıaqtalǵannan keıin qatynaıdy.
Qosymsha shattl-marshrýttardyń iske qosylýy stadıon mańyndaǵy kólik keptelisin azaıtyp, kórermenniń kontsertke baryp-qaıtýyna qolaıly jaǵdaı jasaýǵa múmkindik beredi. Sondaı-aq kontsert ótetin orynǵa «Tarlan Astana» jeńil relsti kóligi arqyly jetýge bolady.
