Qaırat Nurtas jaqyn arada tyńdarmandaryna jańa ánder usynbaq
ASTANA. QazAqparat - Ánshi, «MýzTV» telearnasynyń arnaıy syılyǵy - «Qazaqstannyń úzdik jyl ártisi» atalymynyń jeńimpazy Qaırat Nurtas «Qazaqstan» telearnasyndaǵy «Tańsholpan» baǵdarlamasynda qonaqta boldy, dep habarlady ulttyq arnanyń baspasóz qyzmeti.
«Suhbat bermegenime biraz ýaqyt bolypty. Búgin sizderdiń baǵdarlamalaryńyzǵa sáti túsip, kelip otyrmyn. Óte qýanyshtymyn. Maǵan kóbine kóńil-kúıińiz qalaı, januıańyz bar ma degen suraqtardy jıi qoıady. Ol meniń jeke ómirime qatysty bolǵasyn, jaýap berýden bas tartýǵa májbúrmin. Kórermender meniń ónerimdi, shyǵarmashylyǵymdy baǵalasa deımin», - dep bastady áńgimesin stýdııa qonaǵy.
Syılyqty ıelengen kezdegi áserimen bólisken Qaırat: «Árkimniń óz armany bar. Óz elińde mundaı syılyq alý meniń ǵana emes, ár ánshiniń armany, dep oılaımyn. Bul júldege aldymen Allanyń qalaýymen, sosyn halyqtyń qoldaýymen ıe boldym. Óte qýanyshtymyn. Osy dodada qarsylas bolǵan ár ánshi myqty talant. Olarǵa aldaǵy jobalarda topty jaryp shyǵýlaryna tilektespin»,- deıdi Qaırat.
«MÝZ TV» syılyǵy eki eldiń mádenıetin biriktirip, ánshilerin bir-birimen tanystyrdy, jaqyndastyrdy, bir sahnada án salýǵa múmkindik berdi. Syılyqtyń dál bizdiń elde ótýi - úlken jetistik», - dep aǵynan jaryldy Q.Nurtas.
Aldaǵy josparlarymen bólisken ánshi: «Aldaǵy ýaqytta tyńdarmanǵa usynar 3-4 ánim daıyn tur. Jaqyn arada usynatyn bolamyn. Ánder mahabbat jaıynda. Ýaqyty kelgende halyq baǵasyn bere jatar»,- dedi.
Kezdesý sońynda «Tańsholpan» baǵdarlamasynyń júrgizýshisi Irına Ten Qaırat Nurtasqa Bekbolat Tileýhannyń «Qaırat myńdaǵan tyńdarmannyń júrek qylyn sherte biledi» degen jazýy bar arnaıy syılyǵyn tabys etti.
