Qaırat Nurtas pen Aıqyn Tólepbergendi shaqyrǵan aqtóbelik kásipkerler aıyppul tóledi
AQTÓBE. QazAqparat – Aqtóbede karantın erejesin saqtamaı, ánshilerdi ujymdyq keshke shaqyrǵan kásipkerlerge aıyppul salyndy.
Bul týraly oblystyq sanıtarlyq-epıdemıologııalyq baqylaý departamentiniń basshysy Nursulý Berkimbaeva óńirlik kommýnıkatsııalar qyzmetinde ótken brıfıngte aıtty, dep habarlaıdy QazAqparat tilshisi.
Aqtóbe oblysy boıynsha ótken táýlikte 4 adamnan koronavırýs ınfektsııasy anyqtaldy. Barlyǵy da Aqtóbe qalasynyń turǵyny. Baspasóz máslıhaty kezinde oblystyq sanıtarlyq-epıdemıologııalyq baqylaý departamentiniń basshysy Nursulý Berkimbaeva Qazaqstan juldyzdarynyń karantın talabyn saqtamaǵanyn basa aıtty. Mundaı tekserý aldaǵy ýaqytta da jalǵasady.
«Monıtorıng tobynyń jumysy jalǵasyp jatyr. Máselen, Qaırat Nurtas qatysqan shara boıynsha «Auz.T» tamaqtaný jelisiniń (fastfýd) ıesine 319 470 teńge kóleminde (qysqartylǵan túrindegi) aıyppul salyndy. Ákimshilik quqyqbuzýshylyq týraly Kodekstiń 810-babyna sáıkes bir apta ishinde ótese, aıyppuldyń tek 50% tóleýge ruqsat beriledi. Sonymen birge Aıqyn Tólepbergen qatysqan shara boıynsha «Arvana-grand park» laýnj-barynyń zańdy tulǵasyna qatysty tekserý aktisi toltyrylyp, jeke tulǵa Z.Týhmýhambetovaǵa 41 670 teńge kóleminde (qysqartylǵan túrindegi) aıyppul salyndy. Olardyń ujymdyq, oıyn-saýyq is-sharalaryn ótkizgeni, kelýshilerde jáne uıymdastyrýshylarda medıtsınalyq betperde bolmaǵany jáne adamdar arasyndaǵy áleýmettik araqashyqtyq saqtalmaǵany belgili boldy», - dep naqtylady oblystyq sanıtarlyq-epıdemıologııalyq baqylaý departamentiniń baspasóz qyzmeti.
Aıta keteıik, Aqtóbe oblysy boıynsha qazir 112 adam koronavırýs ınfektsııasynan em qabyldap jatyr. Onyń 28-i ınfektsııalyq statsıonarda. Pnevmonııa boıynsha sońǵy táýlikte 2 jaǵdaı tirkeldi. Barlyǵy 60-qa jýyq adam dáriger baqylaýynda. Onyń ishinde 13-i jansaqtaý bóliminde bolsa, bireýi ókpeni jasandy jeldetý apparatyna qosylǵan. Al 29 naýqas karantındik statsıonarda jatyr.
